Konferansê Platformê Ziwanê Kurdkî Amed de dest pêkerd

Konferanso ke bi slogana ''Ziwanê ma nasnameyê ma yo, ziwanê ma estbîyayîşê ma yo'' hetê Platformê Ziwanê Kurdkî ra ame organîzekerdene Amed de ame destpêkerdene. Qiseykerdişê akerdişî de bale ame antene tehlukeyê vera kirmanckî ser.

Platformê Ziwanê Kurdkî yo ke bi têhetameyîşê partîyanê sîyasîyan ê kurdan ame ronayene  bi slogana ''Ziwanê ma nasnameyê ma yo, ziwanê ma estbîyayîşê ma yo'' konferansêk organîze kerd. Konferans otelêkê Sûrî de ame destpêkerdene.

Konferanso ke çarçewa 21ê Sibate Roja Ziwanê Dayîke ya Dinya de yeno viraştene temsîlkarê partîyanê sîyasîyan û rêxistinanê komelê sivîlî tewrê ci bîyî.

Vervatoxê Platformê Ziwanê Kurdkî Şerefxan Cizîrîyî derheqê girîngîya xebatanê ziwanî de qisey kerd. Endamanê platformî ra Hayrettîn Altunî zî ard ziwan ke lehçeyê kirmanckî bi tehlukeyê çînbîyayîşî rî bi rî yo û waşt ke ci rê wayîr bêro vejîyayene.

Konferans de do bi sernameyanê Ziwan û Perwerde,  Ziwan û Şar, Ziwan û Roşnayî, Ziwan û Fermîyetî de bêro qalkerdene.

Platformê Ziwanê Kurdkî de nê partîyî ca gênê: Partîya Herêmanê  Demokratîke (DBP), Partîya Demokratîke ya Şaran (HDP), Partîya Azadîye û Merdimîye (PİA), Partîya Komînîstî ya Kurdistanî (KKP), Partîya Sosyalîstan a Kurdîstan (PSK), Partîya Azadîye ya Kurdîstanî (PAK), Partîya Demokrate ya Kurdîstanê - Tirkîye (PDK-T), Platformê Demokratan ê Kurdan (PDK-Vakur) û Partîya Azadîye.