'Ma amade yê ke meseleyan pê dîyalogî çareser bikerê'

Hetkarê Hemserekanê Heyetê Rayberdişî yê Îdareyê Xoserî yê Şingalî ard ziwan ke herinda viraştişê kaosan de ganî meseleyî pê dîyalogan çareser binê û venga şarê Başûrî da ke vera nê kerdişan nêrazîbîyayîşê xo bimojno.

Hetkarê Hemserekanê Heyetê Rayberdişî yê Îdareyê Xoserî yê Şingalî Azad Hisênî hêrişê vera Şingalî û Şingal de zêdîyayîşê têgêrayîşê artêşa Iraqî ANFyî rê ercnayî.

 Azad Hisênî pare kerd ke hêrişanê dewleta tirke yê vera Şingalî ra artêşa Iraqî mesuldar a û vat: ''Wexto ke dewleta tirke hêrişê Şingalî kena artêşa Iraqî zî tîya de ya. Artêşa Iraqî 24 saetan Şingal de teyarayanê keşf û şeran pernena. Ma nêwazena beşêko hîna pîl ê artêşa Iraqî Şingal de cabibo. Xora polîsê ma û Asayîşê Êzidxanî estê. Nê hêzî asayîşî anê ca. Şar zî ney nêwazeno. Hema zî destê DAÎŞî de esîrê êzidîyî estê, gooranê komkîyan ra esteyî nêameyî vetene. Ê hêzê ke wazenê Şingal de ca bibê bîyî sebebê Qirkerdişê Êzidîyan û nê kesî hema zî şarê ma ra uzrê xo nêwaşt.''

Hisênî waşt ke wa artêşa Iraqî kerdişanê ke Şingal de do bibê mesele war verde û vat: ''Artêşa Iraqî destûr nêda peykerê Zerdeşt Şingalîyî. Ê îradeyê şarî qebul nêkenê. La ma amade yê ke bêrê pêser û meseleyan pê rayîrê dîyalogan çareser bikerê. Ma seba aramîya nê şarî destê ma ra çi yeno do bikerê. Ma dûştê hukmatê Iraqî nîyê têna ma dûştê a artêş ê ke hetê tay hêzan ra verdîyena ma ser. Çunke nê hêzî wazenê kaosî virazê. Dewleta tirke her roje hêrişê Şingalî kena la Iraq vera ney bêveng o. Coka Iraq zî mesuldaranê nê hêrişan ra yo.

PDK zî wazeno na têmîyanîye de debikewo Şingal. La şarê Şingalî înanê ke bêbextîye kerd û bîyê sebebê êzidîyan do qebul mekero. PDK kam binê serdestîya ci de nêbo sey dişmenê xo vîneno. Şarê ma yo ke kampanê Başûrî de maneno wa ney hol bizano. Ganî şarê Başûrî zî vera nê kerdişan bêveng nêmano. Wa şarê ma abigêro Şingal û Şingalî newe ra awan bikero.''