Hemvervatoxa Heyetê Îdareyanê Xoserîyan ê Demokratîkan ê DEM Partî Canane Kepenç ANFyî rê qisey kerd.

Kepençe ard ziwan ke DEM Partî şaredarîyan de seba cinîyan xeylê karî kena û îfade kerd ke bi şîarê 'Qisey nêqedîyayo, ma do şîdetî vindarnê' ê wazenê şaristananê winayênan awan bikerê ke cinîyî tede azad bibê.

Canane pare kerd ke îqtîdarê AKPyî yo faşîst her roje hêrişê destkewteyanê cinîyan keno û vat ke seba ke sîstemê 'hemserekîye' sey gefî vîneno qeyûman tayînê şaredarîyan keno. Canane vat: ''Têkoşînê têdûştîye û azadîye yê cinîyan şexsê sîstemê ma yê hemserekîye de gandar bîyo coka tim bîyo hedef. Îqtîdar xîret keno ke nê têkoşînî krîmînalîze bikero. Hêrişê peyê weçînayîşan û nikayênî zî naye ra yê. Şarê Êlihî cewab da nê hêrişan û Gulîstane Sonuk temamîya Tirkîya de mîyanê pêro namzedanê şaredaran de raya tewr pîle girewte.

Sîstemê hemserekîye sîstemêko winayên o ke cinîyan reyde komelî zî azad keno. Îqtîdar coka nê sîstemî keno hedef. Ma pêro şaredarîyanê xo de serekîyê dayîreyanê cinîyan, mudirîyê cinîyan awan kerdî. Ma 'Xeta Alo Şîdetî', merkezê paştdayîşê cinîyan, kreşî akerdî. Bi şîarê 'Qiseyê ma nêqedîya, ma do şîdetî vindarnê' ma kampanyaya vera şîdetî daye destpêkerdene. Ma wazenê ke îmkananê winayênan biafernê ke cinîyî bieşkê bi asanî xo biresnê mekanîzmayanê têkoşînî. Ma do şaristananê winayênan awan bikerê ke cinîyî do tede azad bibê.''