Îbrahîm Încedursuno çewlîgij semedê şarê xo keda pîle daye, morê xo da binê karanê muhîman ro û aşma temmuze ya 1994î de tewrê kewanê bêmergan bi. Serrgêra şehadetê ci ya 26. de Încedursun sey qehremanêkê pîlî vîr û zerrîya şarê kurdî de yo.
Îbrahîm încedursun (Kazim) qezaya Dara Hênî ya Çewlîgî ra yo. Dibistano verên Dara Hênî de, mektebê mîyanên û lîse zî Mûş de waneno. 1972 de beşê muhendîsîya makîne yê Unîversîteya Tekînî ya Îsanbulî qezenc keno. Ciwanêko merakdarê sporî yo. Unîversîte de veleybol kay keno û boks keno. Dimayê unîversîte demêk boksorîye keno û sey temsîlakrê tirkîya tewrê musabayan beno û şampîyonîya boksî yê Ewropa Tirkîya rê dano qezenckerdene.
Îbrahîm Încedursun seba ke kurdo raştê zextî yeno no semedî ra serra 1985î de verê xo dano Ewropa û Norveç de ca dano xo. Tîya Têgêrayîşê Azadîye yê Kurdan nas keno. Şewe, roje nêvano tewrê heme xebatan beno. Seba ke xebatê welatanê Îskandinavya ameyî roniştene, keda ey naye de zaf a.
Xebtanê xo de tim serkewte yo. Bi vatişê ''Ma gerek şoreşî verî karekterî de bikerê '' şino xo ser ke layiqê têkoşînî bi. Bi kesayîtîya xo ya giran û zanaye zaf yeno heskerdene û her hetî ra hurmet vîneno.
Badê Norveçî xabatanê xo rê Îngîlîstan de dewam keno. Hetêkî ra dezgehan de gurîyeno hetê bînî ra vera hêzanê kanperestan de têkoşîn keno. Încedursun bi vatişê ''Ma do Îngîlîstan bikerê Botan'' qerardarîya xo ramojneno.
Demêkî ra dima semedê xebatanê ronayîşê HEPî agêreno Çewlîg. Tîya şarê rêxistin keno. Reya verêne ke Çewlîg de Newroz kîtlekî yeno bimbarekkerdene. Ronayîşê HEPî de beno sekretere pêroyî yê partî. Vîjnayîşî de rixmê heme îtîrazan û o wazeno namzedê Çewlîgî bo û biisrar beno namzedê memleketê xo la nîno vîjnayene.
Sereyê 1991 de şaro ke Başûrê Kurdîstanî ra zilmê Sadamî ver remayo, semedê hetkarîya nînan Încedursun kampanyaya paştdayîşî rê serekîye keno.
O wex ke roje de çend kesî hetê dewlete ra ameyêne remnayene û qetilkerdene Serekê HEPyî yê Amedî Vedat Aydin zî yeno remnayene û qetilekrdene. Cenazaya Aydinî ya 10ê temmua 1991î de rojêka tarîxî yena ciwîyayene. Bi des hezaran kesî semedê tewrbîyayîşê cenaza verê xo danê Amed. Încedursun zî uca de yo. Polîs hêrişê rayraşîyayîşî ke verê cenazaya yeno kerdene keno. Încedursun xo şarê xo rê keno mertal. A roja ke 8 kesî ameyî qetilkerdene Încedursun yeno destbendkerdene û îşkenceyanê giranan vîneno.
Dima ra Încedursun verê xo dano Başûrê Kurdîstanî û Kampa Zele de maneno û tewrê xebatana ronayîşê Meclîsê Neteweyî yê Kurdîstanî (KUM) yo ke hetê PKKyî ra ameyêne ronayene beno. Încedursun bado zî koyanê azadan ê Kurdîstanî de semedê şar û welatê xo têkoşîn keno.
Încedursuno ke 3 kênayê ci estê badê şîyayîşê ci lajêkê ci zî beno la o ey qet nîvîneno. 3 serran ra dima reyna ê rojanê temmuze yê 1994î de Amed de pêkewtişêk de pîya bi 12 embazanê xo tewrê kerwanê şehîdanê Kurdîstanî beno.
