Ronî: Kurdkî ser o tehlukeyêko pîl esto

Hemserekê MED-DERî Rifat Ronîyî ard ziwan ke ziwanê tirki hînî dewan de bîyo ziwanê serdestî û îfade kerd ke no kurdkî ser o tehlukeyêko pîl o.''

Her ke şino teda û qedexeyê vera kurdkî zêdîyenê. Hemserekê Komeleya Cigêrayîşê Kultur û Ziwanî ya Mezopotamya (MED-DER) Rifat Ronîyî ANFyî rê tedaya vera kurdkî û rewşe ser o qisey kerd.

Ronîyî pare kerd ke ronayîşê Komara Tirkîya ra nata dewlete xîret kena ke kurdan asîmîle bikera, kurdkî qedexe bikera û vat: ''Her ke kurdkî aver şina sîstem metodê astengîye nano verê ci. Serra 2004î ra heta 2015î xeylêk dezgehan semedê averberdişê kurdkî bingeyêk awan kerd. Amed de tewr tay 2 hezar dibistanê tirkî estê la dewlete yew dibistana kurdkî zî anêkerde. Key astengîyê vera ci wedarîyê û azad biba kurdkî bena mende.  Polîtîkayê qedexeyî yê vera kurdkî dewam kenê. Ganî ma wayîrê ziwanê xo vejîyê. Ziwan hişê komelan, îdeolojî, fikr û ameyox o.''

Ronîyî da zanayene ke dewlete teknolojî semedê asîmîlasyonî xebitnena û vat: ''Ganî kurdkî TV, televîzyon û înternet goreyê waştişanê dewlete meşuxilnê. Bi taybetî dewan de herinda kurdkî de hînî tirkî kewena serê ziwanê kurdan. No tehlukeyêko pîl o. Nika tirkî semedê teknolojî her ca de ya. 

Ziwan semedê azadîya şaran şerto destpêk o. Qedexekerdişê ziwanê kurdkî tim rojdemê îqtîdaran de bi. Ziwan semedê netewebîyayîşî sereke yo. Qeyûman şaristananê ma de verî dest eşt tabelayanê kurdkî. Madem sîstem vera erjanê kurdan bi yewî têgêreno kurdî zî ganî semedê pawitişê nê erjan pîya têbigêrê.''