Akkuzu: Nêbeno ke hunermendî bêalternatîf bimanî

Şaredarîyanê HDPyî de yê ke bi qeyûman ameyî xespkerdene karê çand û hunerî zî vindertî. Serekê Daîreyê Kulturî yê Şaredarîya Şaristanê Pîlî yê Amedî kaykerdoxê tîyatroyî Yavuz Akkuzuyî derheqê tesîrê qeyûman ê vera kultur û hunerê de qisey kerd. ​​​​​​​

Şaredarîya Şaristanê Pîlî yê Amedî ya HDPyî 19ê tebaxe de hetê qeyûmî ra ameye xespkerdene. Karê Serekîya Daîreyê Kulturî ya Şaredarîye zî rîyê xespkerdişê qeyûmî ra vindertî.  Serekîya Daîreyê Kulturî ya Şaredarîya Amedî ya ke destsernayîşê şaredarîye ra verî her roje aktîvîteyêka kultur û hunerî kerdêne qeyûmî ra dima nêeşkaye aktîvîteya kulturî bika. Serekê Daîreyê Kulturî ya Şaredarîya Amedî Yavuz Akkuzuyî ANFyî reyde derheqê tesîrê qeyûman ê karanê kultur û hunerî de qisey kerd.

Akkuzuyî vat: "Weçînayîşê 31ê adare ra dima wexto ke HDP ser kewt sere de domanî her kes seba çalakîyan waştişê warêkî kerd. Mabênê 5 mengan de ma karêko xurt kerd. Aslê xo de hamnan seba festîvalan musaîd nîyo. La seba ke ma xîretê hunermendanê xo dî ma heta tayînkerdişê qeyûmê dîyinî nêzdîyê panc festîvalî serûber kerdî. Ma aktîvîteyê tîyatroyî, sînema, domanan, fîlmî û ziwanî kerdî. Têna şaredarîye reyde zî ney ma rêxistinanê komelkîyan reyde zî bi hawayêkê hemparî aktîvîteyî kerdî."

Akkuzuyî îfade kerd ke dima ke qeyûm ame tayînkerdene karê înan vindertî û têna hunerê kurdkî ney hunerê tirkî zî derbeyêke werde. Akkuzuyî pare kerd ke vera bêfirsendan ganî hunermendî bieşkî alternatîfan awan bikê û vat ke wextêkê kilmî de ê do bînayêka newîye de sey merkezê hunerî û kulturî bivisnê xizmetî ver.