Almanya de hêrişê AKP'yî yê vera Kurdan ameyî protestokerdene

Xeylî bajaranê Almanya de vera xespkerdişê şaredarîyanê Bajaranê Pîlan ê Amed, Wan û Mêrdînî çalakîyî ameyî viraştene û  hukmatê Almanya û welatanê Ewropa ame waştene ke ê vera  hêrişanê hukmatê AKP’yî bêveng memanê.

Almanya de Kurdistanijî û dostê înan bi rojan o  meydanan de yê. Bi desan bajaran de vizêr reyna çalakîyê protestokerdişî yê xespkerdişê îradeyê şarî ameyî viraştene. Çalakîyan de mesajê paştdayîşê HDP’yî û xurtkerdişê mucadeleyî ameyî dayene.

Berlîn: Paytexê Almanya Berlîn de bi rayraşîyayîşêk îşxalê xespkerdişê îradeyê Kurdan ame şermezarkerdene.

Hamburg: Bajarê Hambur de bî tewrbîyayîşê şarê Kiel, Stade, Luneburd û Winsen-Luhe rayraşîyayêş ame viraştene xespkerdişê şaredarîyanê HDP’yî ame şermezarkerdene.

Stuttgart: Bajarê Statutgartî zî Kurdistanijî vejîyayî meydanan û vera hêrişê AKP-MHP’yî yê vera Kurdan razînêbîyayîş ramot û paştî daye HDP’yî.

Aachen: Bajarê Aachen de zî çallakîyêk ameye viraştene û derheqê hêrişanê dewleta Tirkî de vilawekî ameyî vilakerdene.

Freîburg: Bajarê Freîburg de zî bi çalakîyêk polîtîkaya hêrişkare ya AKP’yî ya vera Kurdan ameye protestokerdene.

Bremen: Bajarê Bremen de zî Kurdistanijî û dostê înan vejîyayî meydanan û hêrişê îqtîdarê faşîstî yê vera îradeyê Kurdan protesto kerd.

Bîelefeld: Bajarê Bielefeldde zî semedê paştdayîşê HDP’yî çalakîyêk ameye viraştene. Çalakgeran hêrişê îqtîdarê faşîstî yê vera şaredarîyanê Kurdan protesto kerd.

Munîh: Bajarê Munîhî zî Kurdistanijî vejîyayî meydanan û vera hêrişê AKP-MHP’yî yê vera Kurdan razînêbîyayîş ramot û paştî daye HDP’yî.

Frankfurt: Bajarê Frankfurt de zî vera xespkerdişê şaredarîyanê HDP’yî çalakîyêk ameye viraştene û îqtîdaro faşîst ame şermezarkerdene.

Dusseldorf: Bajarê Dusseldorfî de zî Kurdistanîjî çalakîye de bî. Qiseykerdişan de ame vatene ke îradeyê şarî reyna hetê qesrî ra ame xespkerdene la Kurdî vera naye çok nêdane.