Almanya derheqê grevê vêşanîye de ker, kor û lal a

Musteşarê Karanê Zereyî Mayer hem vano 120 çalakîyî ameyî viraştene, hem zî vano xêrca xeberê ke çapemenîye de vejîyeyî ra dot xebera înan bi çîyêk çin a.

Grevê vêşanîye vera tecrîdê serê Rayberê Şarê Kurdî Abdullah Ocalanî, her hetê dinyaye de dewam kenê. Rewşa xoverdayoxanê grevê vêşanîye êdî asta krîtîke de ya. La no derheq de ne CPT‘yî, ne zî YE’yî ra veng nêvejîyeno.

Seba ke Hukmato Federal ê serekwezîrîya Merkele, derheqê grevanê vêşanîye de tewirê xo ramojno , hewteyê verî  Partîya Çepe, grevê vêşanîye Meclîsê Federalî de ardbî rojdem. Parlamenterê Partîya Çepe Gokay Akbûlûte, hukmatî rê nê di persî perskerdîbî:

 “ Seba ke tecrîdê serê Abdullah Ocalanî yo ke Tirkîya de girewteyo bêro wedaritene, grevê vêşanîye ameyî destpêkerdene û nê grevan de hemwelatijê Alman û kesê ke Almanya de wayîrê desturê roniştişîyê estê yan çin ê û Hukmato Federal no derheq de wayîrê senî zanayîşan o?

Hukmato Federal derheqê grevê vêşanîye yê ke bi talebê tecrîdê serê Ocalanî bêro wedaritene ameyî dest pêkerdene de wayîrê senî zanayîşan o? Hetê bînî ra eke xoverdayoxê grevê vêşanîye yê ke hetê weşîye ra restê asta krîteke de yê bimirê Hukmato Federal do se bikero û no derheq de  texmîn keno ke senî çiyî do bêrê qewimîyayene?“

Bi nameyê hukmatê Merkele, Musteşarê Karanê Zereyî Stephan Mayerî cewab da persan. Mayerî bale ante grevanê vêşanîye ser û wina va: “Xêrca xeberê ke çapemenîye de vejîyaye, hukmat çîyêk nêzano.“ Cewab bi hawayê nuştekî ame dayene û persa diyîne rê zî cewabêko winasî ame dayene: “Almanya de 7’ê Teşrîna Peyêne 2018’î ra heta 15’ê Sibate 2019’î , derheqê grevê vêşanîye yê seba Azadîya Ocalanî de 120 çalakî û mitîngî ameyî viraştene.“

Endamê CSÛ’yî Mayerî wina dewam kerd: “Hem hetê fedaral, hem zî hetê îdareyê herêmî ra, hêzê ewlekarîye qewimîyayîşan teqîb kenê.“

Musteşar Mayerî cewabê xo yê kilmekî de ca da lîsteya çalakîyê ke 7’ê Teşrîna Peyêne 2018’î ra heta 15’ê Sibate 2019’î,  bajaranê cîya-cîyayan ê  Almanya de, vera tecrîdî ameyî kerdene. Lîsteya 4 rîpelî de, bi hawayêko hîra ca dîyo ca, tarîx û babeta çalakîyan.

Partîya Çepe menga Çele de grevê vêşanîye kerdîbî rojdemê Meclîsê Federalî. Wezîfedarê Dewlete yê Karanê Ewropa Michael Rothî cewab daybî. Rothî hukmatê Tirkîya ra waştbi ke wa tecrîdê Îmralîyî wedarno.

Wezîr Tothî vatbi ke ganî tecrîdê serê Ocalanî bêro wedaritene, keye û avukatanê xo de pêvînayîşan bikero. La nê beyanatî ra dima hetê pratîkî ra yew game nêameyê eştene.