Almanya û Hollanda de çalakîyê Ocalanî rê azadîye
Almanya û Hollanda de semedê protestokerdişê tecrîdê serê Rayberê Şarê Kurdî Abdullah Ocalanî û qerarê Amerîka yê ke hîrê îdarekaranê PKKyî hedef geno çalakîyî ameyî viraştene.
Almanya û Hollanda de semedê protestokerdişê tecrîdê serê Rayberê Şarê Kurdî Abdullah Ocalanî û qerarê Amerîka yê ke hîrê îdarekaranê PKKyî hedef geno çalakîyî ameyî viraştene.
Bajaranê Dusseldorf û Hamburgî yê Almanya û paytextê Hollanda Amsterdam de tecrîdê Îmralî û qerarê Amerîka ameyî şermezarkerdene.
Dusseldorf de çalakîya ke verê konsolosxaneyê Amerîka de ame viraştene bi rêzgirewtişî dest pêkerd. Endamê Merkezê Komelê Kurdî yê Demokratîkî û Însîyatîfê Cinîyan ê Nalînî yê Dusseldorfî û Komunê Tîjda Ekecîkî yê Grevenbroichî tewrê ci bîyî.
Çalakîye de ame vatane ke qerarê Amerîka vera heme kurdan o û çîyo winayên nîno qebûlkerdene.
Çalakwanan bi wesîleya serragêrayîşê 81. ê Seyîd Rizayî û embazanê ci ê zî yad kerd û da zanayene ke ê do xeta pîranê xo ra şirê.
Hamburg de zî bi rojan o çalakîyî bêmabên dewam kenî. Vizêr reyna çalakîyêk ameye viraştene. Kurdîstanijî û dostê înan verê parlamento de ameyî têhet û qerarê Amerîka û tecrîdê serê Ocalanî protesto kerdî.
Paytextê Hollanda Amsterdam de zî bi heman waştişî Kurdîstanijî û dostê înan verê konsolosxaneyê Amerîka de ameyî pêser û hemverê qerarê Amerîka û tecrîdê Îmralî de reaksîyon ramot.