Avûkat Arksak: Ma kiştê Dayîkan de yê

Avûkat Mûrat Arksako ke hewteyo ravêrte vernîya Zîndanê Bakirkoyî de pîya bi dayîkan hetê polîsan ra bi derbekerişî ame destbendkerdene  ard ziwan ke ê rixmê herêşan kiştê dayîkan de yê.

Merdimê tepişteyanê ke semedê baleantişê greve vêşanîye û rojeyê mergî vernîya zîndanan de çalakîyan virazenê her tim raştê hêrişê polîsan yenê. Çend rojî cuwa ver vernîya Zîndanê Bakirkoyî de avûkatî zî te 7 kesî bi erdî ra kaşkerdişî ameyîbî desbendkerdene dime ra serbest ameyîbî veradayene. Ne avûkatan ra Mûrat Arksakî ANF’yî rê qisey kerd.

Arksakî vist vîrî ke dayîkî bi laçiganê sipîyan tewrê çalakîye bîyî û va: ’’ Hema dayîkî nêşîbî verê zîndanî polîsan hêrişê înan kerd. Dayîkê ke rîyê hêrişî ra ginayî erd rê, polîsan nê dayîkî enciknayêne. Ma embazê avûkatî zî semedê pawitişê dayîkan kewtê mabênê înan.  Ez zî ameya destbendkerdene û wesayîtê debendkerdişî de ameya derbkerdene. Wesayît de înan dayîkî derbkerdêne bisebebo ke ez vera naye vejîyaya rixmo ke destê mi kelepçe kerdebî, înan ez kuwaya. Derheqê naye de mi pêhesnayîşê sucî kerd.

Arksakî ard ziwanê ke polîsan bi kîn hêrişê dayîkan kerdêne û va: ’’ Mi înan ra vatêne nê dayîkê pîr ê. Semedê domananê xo ya qîrêne. La nêzdîbîyayîşê înan vera dayîkan sey terorîstan bi. Çalakîya dayîkan çerweya aşitî û demokrasi de yena viraştene. Ma sey avûkatan tim kiştê dayîkan de yê û seba ke ê heqê xo yê huqûqî bişuxulnê çi ke destê ma ra bêro ma do bikerê.’’