Cemxaneyê Ana Fatma de loqmeyî ameyî vila kerdene

Roja 5. ya aşma Muharremî de elewîyî Cemxaneyê Ana Fatma de ameyî têhet û loqmeyî vila kerdî. Pîr Huseyîn Ozî dîyar kerd ke Hz. Huseyîn vera zaliman de sere nêroneno û heta peynî xover dano.

Bi destpêkerdişê aşma Muherremî ke seba elewîyan pîroz a de elewîyî roje tepişenî û loqmeyan vila kenî. Na çarçewa de Anqara de Komeleya Elewîyê Demokratîke (DAD) Cemxaneyê Ana Fatma vilakerdişê loqmeyan organîz kerde.

Roja 5. ya aşma Muharremî de Şûbayê Mamakî yê DADî Cemxaneyê Ana Fatma de loqme vila kerdî. Şûbeyê Mamakî yê DADî, Merkezê Pêroyî yê HBVKDyî, endamê HDP û PSAKDî û xeylê welatîyî beşdarê vilakerdişê loqmeyî bîyî. Akerdişê rojeyî bi duayanê Pîrê Ocaxê Yanyatirî Huseyî Ozî dest pêkerd.

Ozî akerdişê rojeyî ra ver va ‘Hz. Huseyînî Kerbela de vera zaliman de sere nêrona û vera Yezîdî de vindet’ û wina domna: “Ma ewro seba rojeyê Muharremî kom bîyî. Kerbela ser ro 1338 serrî derbaz bîyî û ma hîna zî şîn gênî. Ê awe nêdanî û pawenî ke Hz. Huseyîn teslîm bibo, labelê o teslîm nêbeno, xover dano. Vera zaliman de sere wedarneno. Hz. Huseyînî ra dima Hallaci Mansur, Nesîmî, Pîr Sultan, Kalender Çelebî û 3 şorişgêrî vindetişê Huseyînî esas girewtî. Ewro tepiştiştê rojeyî şîn o. Ma seba dinyaya bîne roje nêtepişenî.”

Qiseykerdiş ra dima bi gulbangê Pîr Huseyîn Ozî loqmeyî ameyî vila kerdene.