Cinîyê esnafî têna vera krîzî xo ver nêdanê

Cinîyê esnafî yê ke bazarê taxa Jiyanî de dezgehanê xo nanê ro hem pê krîzê ekonomîkî hem zî pê nêzdîbîyayîşanê camêrdan ê esnafan qayîl nîyê.

Cinîyê ke bazaranê taxanê Amedî de bi serran o ke dezgehanê xo nanê ro û bi nê hawayî debarêxo kenê vera zor û zehmetîyanê ke camêrdê esnafî vejenê verê înan xo ver danê.

Cinîyanê ke hewte de 6 rojan bazarê taxê Jiyanî de dezgehanê xo nanê ro derheqê tesîrê krîzê ekonomîkî û zor û zehmetîyan ê ke camêrdê esnafî vejenê verê înan de ANF reyde qisey kerd.

Nurdane Saltika ke Bartin ra ya û 25 serr ê ke Amed de ya îfade kena ke krîzî ra her çi zaf bîyî vay û vat: "Muşterîyê ke yenê verê dezgehanê ma vaya meywe û sewzîyan zaf zêde vînenê. La ma na rewşe ra berpirsîyar nîyê. Camêrdê esnafî xîret kenê ke ma ra erjan biroşê. Bi vaya ke ma hêrînenê ê roşenê. Nê armanc kenê ke wa cinîyî nêeşkê bixebitê. Wazenê ke cinîyî şorê keyeyê xo de ronişê. Keye de 4 domanê mi estê û bi nê dezgehî 3 keyeyî xîret kenê ke debarê xo bikerê. Xora krîzo ekonomîk esto. Krîz tesîrê zengînan ney tesîrê feqîran keno.

Fatma Dogan zî vat: "Ma vera camêrdanê esnafan xo ver danê. Camêrdê esnafî seba ke bimojnê cinîyanê esnafan her çi vaye ra roşenê çi destê înan ra yeno kenê. Nê nêzdîbîyayîşê esnafan rewşe kena hîna bizehmet."

Fîrdevse Çakmak vat: "Ma key zor û zehmetîyan biancê camêrdê esnafî xo rê keyf kenê. Xora tesîrê krîzê ekonomîkî zêde yo. Goreyê 4-5 serrî verê cû her çî zaf bî vaye. "

Şefîke Ulaş ard ziwan ke 48 serrî yo ke bazarî kena û vat: "Zimitan ma zaf tay qezanç kenê. Her çi bena vaye û ma nêeşkenê kar bikerê. Ma şinê hal, uca de tim muneqeşa kenê. Ma gêrenê çîyanê erjanan ke erzan bidê muşterîyanê xo. Êyê ke vanê krîz çin o zûr kenê."