Dadîyêka dêrsimije dua kerde, şilîye varaye

Dêrsim de di aşme ya şewatê daristanan dewam keno. Dadîyêka dêrsimije zîyaranê Duzgun Baba û Jele ra waşte ke wa adirê koyanê Dêrsimî hewna şêrê. Nê waştişî ra dime ra şilîye na pa.

Dêrsim de bi aşman o daristanî bi destê dewlete yenê veşnayene. Hêzê dewlete hem adir hewna nêkenê, hem zî destûr nêdanê şar bi îmkananê xo şewatî hewna bikero. Dare û birrî verê çimanê herkesî de veşayî, bîyî wel. Şewato peyên zî 9 rojî yo Çemê Rojî û dormeyê Koyê Azîz Abdalî de dewam keno.

Goreyê xebera Ajansê Xeberan yê PÎRHA Dêrsim de dadîyêka ke bi dej û hêrsî şewatê koyanê xo vînena û nêşkena hewna bikera, Duzgun Baba û Jele ra hetkarî wazena. Duaya şîlîye ser ra wextêko kilmêk vîyart û dima ra şîlîye varaye.

Dadîya dêrsimîje dîyar kerde ke aye şewa îne çirayê xo fînayî ta û Duzgun Baba û Jele ra waşta ke seba hewnaşîyayîşê şewatî wa şilîye bivaro û wina dewam kerde: “Waştişê mi eynî roje de ame ca, şîlîye varaye. Eke zerrîya merdimî pake bo û merdim zerrîya safîye ra çîyêk biwazo, Duzgun Baba û Jele qebul kenê.”