'Dedeyî (Pîrî) ganî verê serekê Dîyanetî de destan medê pêser'

Hemwelatîyanê Dêrsimijan bi munasebetê zîyaretê serekê Karê Dîyanetî Alî Erbaşî yê Cemxaneyê Dêrsimî PÎRHA rê qisey kerd. Hemwelatîyan destpêsernayîşê dedeyan ê verê serekê Karê Dîyanetî rê reaksîyon ramot.

Komela Vilakerdişê Kulturê Haci Bektaş Velîyî û ya Paştîdayîşî û Cemxane de çîyêko ewilên virazîya. Serekê Karê Dîyanetî Alî Erbaşî cemxane zîyaret kerd. Zîyaret de serekê komele Alî Ekber Yurtî û dedeyanê cemxaneyî Gormezî ra waşt ke statuya qanûnî bidîyo bi cemxaneyan.  

Hemwelatîyanê Dêrsimijan zîyaretî rê reaksîyon ramot û vat: „Ma nê halî qe  rind nêvînenê. Heyf ro ê dedeyan ke verê serekê Karê Dîyanetî de destî nayê pêser. Tîya bi serran o cemxane esto. Çira heta ewro zîyaret nêkerdo, la emser kerdo. Manaya nê çi ya, nê de planêk esto.“

'ÇI KARÊ DEDEYAN BI SEREKÊ KARÊ  DÎYANETÎ ESTO?'

Hemwelatîyan heman wext de hemverê seva dedeyan vetişê pasaportê gewrî rê zî reaksîyon ramot û vat: „Eke serekê Karê Dîyanetî yeno tîya û dedeyê ma zî bi pasaportanê gewran şinê teberê welatî ma nê halî rind nêvînenê. Nê de teqez menfaatêk esto. Êyê ke şiyê dede nêyê, seva pereyan şîyê.“