Dr. Ernstbrunner şi serdana Agaoglû û Yîgîtî

Dr. Hagen Ernstbrunner şi serdana xoverdayoxanê grevê vêşanîye Şîvan Agaoglu û Sultan Yîgît yê ke Vîyana de 48 rojî yo gevê vêşanîye de yê û vat, naye ra dima her di çalakwanî bi şeklêko nîzamî do bêrê kontrolkerdene.

Paytextê Awusturya Vîyana de, Kurdistanijî bi nameyê Şîvan Agaoglu û Sultan Yîgît seba wedaritişê tecrîdkerdişê Rayberê Şarê Kurdî Abdullah Ocalanî 48 rojî yo gevê vêşanîye de yê. Dr. Hagen Ernstbrunner o ke demêko derg Nêweşxaneyê Rudolfstiftungî yê Vîyana de serhekîmîye kerda, şi serdana çalakwanan.

Dr. Ernstbrunner o ke eynî wext de aktîvîstê rêxistina Doktoranê Sînornenas o, kontrolê weşîye yê Agaoglu û Yîgît kerdî. Kontrolkerdişî ra dima Dr. Ernstbrunner çalakwanan reyde, xoşebere kerde û ard ziwan, goreyo ke çalakîya grevê vêşanîye kewta roja 48’ine zî çalakwanî hetê moral û îrade ra baş ê.

Grevê vêşanîye çalakîyêka bimana ya

Dr. Ernstbrunner ard ziwan, çalakwanî vera roşnîye bîyê hesas û da zanayene, nika ra tepîya o teba hevalêkê xo yê bîn ê doktorî, rewşa çalakwanan a weşîye do bi şeklêko nîzamî kontrol bikerê. Dr. Hagen Ernstbrunner bale ante serê çalakîye û vat, “Grevê vêşanîye çalakîyêka hem bimana ya hem zî zaf bizehmet a.”

Doktoro Awusturyayijî ard vîr ke grevê vêşanîye vera tecîdkerdişê Ocalanî yeno kerdene û vat, “Ez waştişê çalakwanan fehm kena,  waştişê xo ca de yo. Ez nêzana çalakîyê grevê vêşanîye bi pêroyî ser kewenê yan nê. Labelê qet nêbo Kurdî bi rayîrê nê çalakîyan bale ancenê serê heqanê înan ê ke ameyî xespkerdene.”

Dr. Ernstbrunner ard ziwan ke, o wextêko dergo têkoşînê Kurdan nas keno, demêk Kurdistan de zî doktorîye kerda û cehd kerdo timî leyê Kurdan de bimano. Dr. Hagen Ernstbrunner waşt, çalakwanê grevê vêşanîye teyna nêrê verdayene.