Fînlandîya de seva heqanê heywanan kampanyaya bi 140 hezar îmzaya

Di organîzasyonê pîlî yê Fînlandîya yê ke heqanê heywanan pawenê, 140 hezar îmzayê ke seva projeyê qanûnî yê pawitişê heywanan bêro xurtkerdene dayî meclîse.

Anamalia û Federasyonê Komeleyanê Pawitişê Heywanan ê Fînlandîya (SEY) projeya hukmatî rind labelê kemî dî. Organîzasyonan waşt ke proje de ca bidîyo qedexeyê endustrîya kurke, panayîşê çewlîganê kurkan û heywanê serrebirnayîşî qafesan de yan zî cayanê girewteyan de nêrê tepiştene. 

Mai Kivelaya ke dîrektoranê Animalia ra ya seva îmzayan eşkerayîyêka çapemenî ya nûştekîye daye û vat: „Her çend proje peyê Swêd, Danîmarka û Norwecî de ya zî hukmat behsê averşîyayîşî keno.“  

SEVA PANAYÎŞÊ ÇEWLÎGANÊ KURKAN ÇALAKÎ

Pawitoxanê heqanê heywanan roja dişemeyî şaristanê Kauhava ke tede çewlîgê pîlî yê kurkan estê seva panayîşê çewlîgan çalakî viraşte.Fînlandîya de se ra 95ê ci qeraxanê rojawanê welatê ci de nizdê 900 hebî çewlîgê kurkan estê.

MUCADELE DE SÎLEHO NEWE: RESIM Û FÎLMÎ

Aktîvîstanê ke mîyanê serranê 2000an de eştêne sere çewlîgan û heywanî serbest veradayêne, herinda nê de bi resim û fîlmanê ke ê çewlîgan de ancenê wazenê bale biancê.

RESIMÎ 20 WELATAN DE AMEYÎ WEŞANAYENE

Aktîvîstî eşkabî bikewê çewlîgêkê luyan û resmê luyanê ke bi dîyayîşê hormonî bihawayêkê hedravîyarteyî ameybî pîlkerdene. Resimî 20 welatan de medya de ameybî weşanayene û bibî sebebê reaksîyon û munaqeşeyan.    

Hemverê heme reaksîyonan de zî projeyê qanûnî yê hukmatî de panayîşê çewlîganê kurkan çino.

Aktîvîstan ra Erja Saaranen ard ziwan ke têgêrayîşê hukmatî yo ke hetê partîyanê raştgêran ra ronîyayo ecêb nêyo, çunke no hukmat hetê zihîfan de nê hetê hêzdaran de yo.  

POLÎSÊ HEQANÊ HEYWANA AME AWANKERDENE

Mucadeleyê aktîvîstan ê seva pawitişê heqanê heywanan ke serranê  1990an ra heta ewro deam keno meyweyê xo dayî. Aşma ke vîyarte de Fînlandîya de reya ewilêne bunyeya Mudurîya Asayîşî ya Helsînkî de yewîyêka polîsan ya ke bi pawitişê heqanê heywanan wezîfedar a amî awankerdene. Sereka SEY Kati Pulli bi eşkerayîyêka nûştekîye ard ziwan ke viraştişê yewîyêka polîsan ya winay3ene seva pawtişê hewanê heywanan gamêka zaf rind a.