''Heskîfê 12 hezar serrî kenê qurbanê awbendê 50 serrî''

Awbendê Ilisû ra 199 dewê pabesteyê Sêrtî, Mêrdînî û Êlihî do binê awe de bimanê. Heta nika tewr tay 20 dewî binê awe de mendî. Hemwelatîyan nêrazibîyayîş ramot û vat: ''Tarîxê 12 hezar serrî kenê qurbanê awbendê 50 serrî.''

Awbendê Ilisû yo ke warê tarîxî û kulturî yê 12 hezar serre do binê awe de biverdo dima ke verê awe ame girewtene herinda herême de golêk ame meydan. Her ke awe berz bena  dorme de vila bena û dewan xera kena. Awbend ra 199 dewê pabesteyê Mêrdinî, Sêrtî û Êlihî do binê awe de bimanê. Heta nika tewr tay 20 dewî binê awe de mendî. Dewa Germavî ya Mêrdînî ra seraserê awbendî heta 35 kîlometreyan awbend derg bi. Ame eşkerakerdene ke heta nika 600 mîlyon metrekup awe kewte awbend û mîktarê awe heta 10 mîlyar û nêm metrekup zêde bibo.

Yeno vatene ke dergîya gole sînoranê qezaya Misirce ra heta Heskîfî 10 kîlometre ya û çeleyê 2020î de gole biresa Heskîfî û tarîxo 12 hezar serre binê awe de vîndî bibo.

Hemwelatîyê bi nameyê Ridvan Ayhan serra 1967î de qezaya Heskîfî de ame dinya. Ayhanî vat: "Serra 1972î de dewlete ma warê ma ra koç kerdî. O çax vatêne şima şikeftan da manenê û no zî beno sebeb ke Tirkîya bêîtîbar bena. Nika zî bi manayanê cîyayan ma warê xo ra kenê û wazenê ke tarîxê ma binê awe de bimano. Domanîya mi Heskîf de derbaz bîye. Eke awe biresa Heskîf hînî ez nêeşkena bêra gorê kalanê xo ser. Ez reya peyêne yena Heskîf ke xatir biwaza."

Hemwelatîyê bi nameyê Mehmet Tîlkîyî zî ê kesan ra yo ke şikefte de manenê. Tîlkîyî vat: "Pêro weşî û tarîxê ma yê kahanî do binê awe de biverdê. Ma wazenê proje bêro batalkerdene. Tarîxê Heskîfê 12 hezar serrî kenê qurbanê awbendê 50 serrî.''

Hemwelatîyê bi nameyê Hasan Yildizî vat: "Ma nêwazenê ke erdê ma yo bibereket û bixêr binê awe de bimano. Her kes Dîcle ra agêreno. Tarîx û merdimîye zî do binê awe de şorê."