Komxebeta Yewîya Neteweyîye dest pêkerde

Komxebata Yewîya  Neteweyîye ya Xebata Îtîfaqê  Kurdîstanî dest pêkerde. Komxebate de metno hempar ame wendene.

Amed de  Kongreya Komelê Demokratîkî (KCD) zî tede îtîfaqo ke hetê 8 partîyanê kurdan ra amebi ronayene seba di rojan Komxebata Yewîya Neteweyîye virazeno. Komxebata ke otelêkê Sûrî de yeno kerdene nê nameyî tewrê ci bîyî. Hemsereka KCDyî Leyla Guven, Hemserekê Pêroyî yê Partîya Herêmanê Demokratîkan (DBP) Salîha Aydenîz û Keskîn Bayindir, Hemserekê Pêroyî yê Partîya Demokratîke ya Şaran (HDP) Sezayî Temellî , Aktîvîstê Têgêrayîşê Cinîyan ê Azadan (TJA), sîyasetmedaro kurd Ahmet Turk, temsîlkarê Komeleya Kurdan ê Demokratan ê Şorişgêran (DDKD), Partîya Merdiman û Azadîye (PÎA), Partîya Komunîstanê Kurdîstanî (KKP), Partîya Demokrate ya Kurdîstanî-Vakur (PDK-Vakur), Partîya Demokrate ya Kurdîstanî-Tirkîya (PDK-T) û Partîya Azadî û xeylêk rîsipî û xeylêk temsîlkarê rêxistina komelî ya sivîlî tewrê ci bîyî.

Komxebate bi wendişê metnê hemparî yo ke di lehçeyanê kurdkî û tirkî ameyo amadekerdene dest pêkerde. Metno kirmankî hetê Salîha Aydenîz ra, kurmankî hetê Sînan Çîftyurekî ra û tikrî zî hetê Ozan Kardaşî ra ame wendene. Qiseykerdiş de akerdişî de ame  vatene ke ê do ewro ra tepîya kombîyayîşan de heta destê înan ra bêro kurdkî qisey bikerê.

Metnê hemparî de bale ameye antenê girîngîya yewbîyayîşê kurdan ser û ame vatene ke vera hêrişanê qirkerdişê ke vera kurdan yenê rayraberdene ganî xoverdayîş bêro girdkerdene û ca dîya nînan. ''Roje roja yewbîyayîşî ya. Ma verî Vakurê Kurdîstanî de îtîfaqo mende nanê ro û dima ra nayî verbi Kongreya Neteweyîye gird kenê. Ganî ma meseleyanê mabênê xo çareser bikerê û dêsanê mabênê xo birijnê û pêro pîya tê bigêrê. Ganî ma vizêr ca verd û biewnî vernîya xo ra.  Ganî heme hêzê ma yê neteweyî bibê yew û pratîk de pîya têkoşîn bikerê dima ra nê rayîrî rexnê bikerê. Ma vanê ya ma do ser bikewê ya zî ser bikewê. Yewna şansê ma çîn o.  Bi xoverdayîşê hemparî ameyox ê şarê ma yo, ê ma yo.‘‘

Badê eşkerayîye kombîyayîş çapemenî rê girewte dewam kerd.