Sey xeylî welatanê bînan ê Ewropa Fransa de zî çalakîyê vera qeyûmî bêmabên dewam kenê. Bajaranê Marsîlya û Montpellîerî yê Fransa de Kurdistanijî vizêr reyna vejîyayîşî kuçeyan û xespkerdişê îradeyê şarî protesto kerd.

Bajarê Marsîlya  ke roja xespkerdişê şaredarîyanê Amed, Wan û Mêrdînî ra çalakîyî dewam kenê de vizêr çalakîya bêîtaatîya sivîle ameye viraştene. Çalakîya ke hetê Têgêrayîşê Ciwanan ê Şorişgêrî ra ameyî organîzekerdene de  hêrişê vera Kurdan ameyî protestokerdene û mesajê girdkerdişê mucadeleyî ameyî dayene.

Bi heman waştişî bajarê Montpellîerî de zî Komînê Cinîyan ê Delal Amede  û Meclîsê Cimatê Demokratîk ê Kurdan rayraşîyayîşêk organîze kerd. Çalakîye de derheqê xespkerdişê şaredarîyanê HDP’yî û hêrişê vera Kurdan ê hukmatê AKP’yî de vilawekî ameyî vilakerdene. Bado zî mîtîngêk ame viraştene û qiseykerdişan de mesajê paştdayîşê HDP’yî ameyî dayene.