Mêrdîn de girewteyêka bîne zî çalakîya fedaîye kerde

Ame zaneyene ke Medya Çinar a ke Hepisxaneyê Tîpê E’yî yê Mêrdinî de ameyêne girewtene, vera tecrîdî çalakîya fedaîye kerde û şehîd bîye.

Goreyê zanayîşanê ke ameyê girewtene girewteya sîyasîye Medya Çinare serê şodirî de vera tecrîdkerdişê Rayberê Şarê Kurdî Abdullah Ocalanî çalakîya fedaîye kerde û cuya xo kerde vîndî.

Girewteya sîyasîye Çinare, girewteya dewaya Nisêbînî bîye.  Çinare Hepisxaneyê Tîpê F’yî yê Wanî de ameyêne girewtene û  verê çalakîye seba mehkeme amîbî ardene Mêrdîn.

Çinare, 31’ê Gulane 2016 de 42 kesan reyde ameyebî tewqîfkerdene. Çinare her tim ardêne ziwan ke, şîyayîş û ameyîşanê dewaya Nîsêbînî de îşkenceyî bi înan yenê kerdene û pawitişê xo de zext û komkiştişê ke verê cû bîyê ardîbî vîrî.

Hetê bînî ra Çinare, bi amancê protestokerdişê tecrîdê serê Ocalanî tewrê roniştişê bi rayîrê SEGBÎS’î nêbîbî.

Heyetêk ke parlamenterê HDP’yî Pero Dundar û Tuma Çelîke zî tede bî, seba girewtişê cenaze şîyî Morgê Tîpê Edlî yê Mêrdînî. Ame zanayene ke heyetî hîna zî cenaze nêgirewta.

Zulkuf Gezen 17’ê Adare de Hepisxaneyê Tekîrdagî de, Ayten Beçete 23’ê Adare de Hepisxaneyê Gebze, Zehra Saglame 24’ê Adare Hepisxaneyê Oltî de çalakîyê fedaîyî viraştîbî. Cenazeyê her hîrê çalakwanan zî hetê dewlete ra ameybî remnayene û wedarnayene.

Bajarê Krefeldî yê Almanya de zî 20’ê Sibate Ûgûr Şakarî, bedenê xo dabi verê adirî û 22’ê Adare de nêweşxane de cuya xo kerdebî vîndî.