Mucadeleyê weçînitişî nê, yê faşîzmî ra xelesîyayîşî

Sezaî Temellîyo ke kombîyayîşê hemserekanê şaristanan de qisey kerd vat do plansazîyêka weçînitişî nêvirazê, herinda nê de mucadeleyê faşîzmî ra xelesîyayîşî bidê. Temellîyî veng da heme hêzanê demokrasî ke tewrê nê mucadeleyî bibê.

Hemserekê Pêroyî yê HDPyî Sezaî Temellî  kombîyayîşê hemserekanê şaristanan de veng da heme hêzanê demokrasî ke mucadeleyî gird bikerî.

Temellîyî ard ziwan ke ê do bi weşînitişanê cayîyan etabêkê neweyî bidê destpêkerdene û vat: “Ma do mîyanê fealîyetêkê kesifî de bibê. Çîyo ke ma kenê tenya plansazîya weçînitişî nêya, mucadeleyê faşîzmî ra xelesîyayîşî yo. Heme şarê Tirkîye destê nê derdî ra dejan anceno. Musebibê nê dejan îqtîdar o. Bi pîlkerdişê şerî wazeno ke îqtîdarê xo bido dewamkerdene. Binpaykerdişê kede resayo merheleya tewr berze.”

 ‘TIRKÎYE WA XO PÊVÎNAYÎŞAN RA BIANCO ÇARESERÎ DO BÊRO’

Temellîyî bale ante ke vengdayîşê înan seba aşitîya Rojakewtena mîyanêne yo û wina vat: “Welatê bînî vanê ke rind o ke Tirkîye xo pêvînayîşan ra ant, do çareserî virazîyo. Ma heman çîyî Sûrîye de zî pawenê. Eke Tirkîye xo pêvînayîşan ra bianco do çareserî virazîyo. Tirkîye vernî ro gamanê çareserîya meseleyê kurdan gêna. Vernîya şaranê Tirkîye gêna ke nêeşkê gaman bierzê.”

 ‘MULTECÎYÎ MEXDURÎYETÊKÊ PÎLÎ CIWÎYENÊ’

Temellîyî derheqê polîtîkayanê Tirkîye yê multecîyîye de zî nê vatî: “Hetêk ra meseleyê multecîyîye xo rê kenê meseleyê bazarî, hetêna ra zî ma vînenê ke multecîyî mexdurîyetêkê pîlî ciwîyenê. Ewropa meseleyê heqanê merdiman de kewta kemasîyêka pîle mîyan. Babeta Sûrîye û heqanê multecîyan de gamî pey de eştê.”

SEBA QEDÊNAYÎŞÊ TECRÎDÎ DAWET

Temellîyî ard ziwan ke bi fezlekeyanê ke derheqê parlamenteranê HDPyî de yenê hadrekerdene bewlî bîyo ke dadgerî xoser û bêhet nêya. Dewamê qiseykerdişê xo de meseleyê tecrîdî ser o vindert û ard ziwan ke grevê vêşanîye yê Leyla Guvene ke seba wedartişê tecrîdê serê Abdullah Ocalanî dayo destpêkerdene azadîya şaranê Tirkîye rê muhîm o û mucadele bêro dayene ke şarê Tirkîye tecrîtî ra bixelesîyê. Temellîyî wina vat: “Dimayê îcraatê xo yê 100 rojan ra vat ke ma do programê 100 rojanê bînan eşkera bikerê. Program de di sernameyî estê: Tankê ke viraştê û keştîyê ke seba şerî şirawitê derya, yanî şer.”

 ‘HÎNA ZAF BÊKARÎ, HÎNA ZAF FEQÎRÎ’

Temellîyî derheqê krîzê Tirkîye de zî wina vat: “Heqê butçe bi temamî ameyo xespkerdene. Dizdîya hîna zafe, bêkarîya hîna zafe û feqîrîya hîna zafe esta. La rixmê nê de wesayîtê luksî yenê herînayene, Saray yena newekerdene û bêguman kadrobîyayîşî dewam kenê. Seke derdêkê ma yê bêkarî çinyo yeno têgêrayene.”

Temellîyî mexduranê KHKyî yê ke gure ra ameybî dûrfînayene zî ardî vîrî û vat: “7 hezarî hekim û doktorî mexdur ê. OHAL nêqedîyayo dewam keno. Ma çirey meseleyê tehqîqatê asayîşî qebûl nêkenê. Na nêheqîyêk a.”

 ‘WEXTÊ REJIMÊ OTORÎTERÎ RA XELESÎYAYÎŞÎ YO’

Temellîyî peynîya qiseykerdişê xo de vat: “Ma veng danê heme dorme, cinî û kedkaran ke xo nê rejimê otorîterî ra bixelesnê. Eke no bica bêro ma do bieşkê gamanê pîlan ê demokrasî û aşitî bierzê. Rayberîya şarê ma seba ma rehber a. Ma do heta weçînitişan bêvindertiş bixebetîyê û qeyûman bierzê çopê tarîxî.”