PE de konferansê Rojawanî dewam keno

Parlamentoyê Ewropa (PE) de konferansê derheqê paştdayîşê Rojawanî û vera îşxalê tirkan de dewam keno.

Beşê diyînî  yê konferansî yo ke çarşeme dest pêkerd 09:30 de do dest pêbiko û babetê îşxalê tirkan, semed û netîceyanê ci, sebebê astengnêbîyayîşê hêzanê mîyanneteweyan, tewirêko senî do bêro mojnayene, seba sucanê şerî yê dewleta tirke zemînê huqûqî de senî hesab bêro persayene, projeyê Rojawanî û rayîranê vejîyayîşê krîzê Sûrîye ra bêrê qiseykerdene.

Qiseykerdişan mîyan de temsîlkarê Îdareyê Xoserî yê Vakur û Rojhelatê Sûrîye, parlamenterê Ewropa, akademîsyenî, temsîlkarê rêxistina komelê sivîlî û muxabîrî estê.

Meşrûkerdişê terorîzmî û komê terorîstî yê destê dewlete do bibê beşêkê konferansî û mudirê Keyeyê Muşahede yê Heqanê Merdiman ê Sûrîye Usame Silêman na babete ser o do ercnayîş biko. Muxabîro misirij Nashet Elheedey zî do hêrişê tirkan ê vera dinya biercno.

Qiseykerdoxê bînî û babetê înan zî wina yê:

Wezaretê Karanê Teberî yê Swêdî ra Per Orneus do behsê tewirê Ewropa yê vera îşxalê Tirkî ser o qisey biko.
Dîplomato verên û şêwirmendo sîyasî Peter W. Galbraîth do çarçewa huqûqî de îşxalê tirkan biercno.

Prof. Dr. Davîd Graeber seba haştîyê rolê komelê sivîlî ser o û Sereka Komîteya Rayberdişî ya Meclîsê Demokratîkî yê Sûrîye Îlhame Ehmed zî ''Seba Sûrîye ganî çareserîyêka senîne do bêra dîyene'' ser o qisey bikê.

Roniştişê roja yewîne de babetanê girîngan ser o bale amebî antene. Bernard Kouchnerî îfade kerdibi ke îşxalê Tirkîya barbarîye ra ber çîyêk nîyo. Endama Keyeyê Muşahede yê Radîkalbîyayîşî yê Fransa Amelîe Chelly zî bale antbî têkilîya dewleta tirke ya bi DAÎŞî. 

Konferans de waştişo verên no yo ke dewleta tirke sucanê xo yê şerî ra bêra hukmkerdene û Yewîya Ewropa do biba wayîra tewirêkê xurtî.