PE de Konferansê Rojawanî: Ganî PKK lîste ra bêro vetene

Parlamentoyê Ewropa de derheqê îşxalê vera Rojawanî de konferansêk ame serûberkerdene. Dîplomatê Verênî yê DYA Galbraîthî vat: "Ganî ma hînî bi çimê rêxistina terorî meewnîyê PKKyî.

Parlamento de roniştişê peyênî yê konferansî de babete ''Berspirsîyarkerdişê Dewleta Tirke'' bîye.

Parlementerê Partîya Keskan Françoîs Alfonsîyî moderatorîya roniştişî kerde û vat: "Dewaya kurdan heta nika meye peygoşkerdene. Ganî Ewropa fam bika ke Tirkîya kewte prosesêkê dîktatoryalî. Erdogan zere û teber de zaf qels bi. Ma ewro rîpelêk nusenê la heta serkewtişê kurdan do zaf rîpelî bêrê nuştene."

Dîplomatê verênî û şêwirmendê sîyasî Peter W. Galbraîthî vat: "Ganî hînî ma bi çimê terorî meewnîyê PKK. PKK serewedaritişêk o. Eke PKK operasyonanê xo yê vera Tirkîya bido vindertene û Tirkîya reyde pêvînayîşê haştîye bêrê destpêkerdene beno ke lîsteya terorî ra zî bêro vetene."

Hemserekê Meclîsê Sûrîye ya Demokratîke (MSD) Rîad Dîrarî vat: "Ganî rêxistinê mîyanneteweyî paştî bidê Îdareyê Xoserî û prosesê demokratîkbîyayîşî û wayîrê berpirsîyarîya xo bivejîyê. Nêzdîbîyayîşê ma yê bi Sûrîye bi hawayêkê azadî û haştîyane yo."

Hemserekê Meclîsê Efrînî Şîraz Hamoyî vat: "Îdareyê Xoserî Serekkomarê Tirkîya ecîz kerd. Tirkîya Efrîn îşxal kerd û verê çimanê komelê mîyanneteweyî de no kerd. Hêzê Efrînî ameyî qetilkerdene ke nê hêzan vera DAÎŞî têkoşîn kerdibi û komelê mîyanneteweyî verê înan çepikî dayêne piro."

Rojnameger Jonathan Spyerî vat: "Tirkîya seba şarê Rûsya menfatêk a. Rûsya cewab dana beşêkê waştişanê aktoran ê bînan û kurdan. Erdogan bi polîtîkayanê xo Rojawan (Ewropa) ra dûr kewt û Rûsya zî bi nê hawayî Tirkîya nêzdîyê xo kerde."

Sereka Komîteya Îdareyî yê Meclîsê Sûrîye ya Demokratîke Îlhame Ehmed zî konferans de qisey kerd.