Temellî: Muxatabo yewin birêz Ocalan o

Hemserekê Pêroyî yê HDP’yî Sezaî Temellîyî va. “Tecrîd sînorê Îmralîyî ra derbaz bîyo û pêroyê komelê Tirkîya binê tecrîdî de yo. Ganî no tecrîd bêro şikitene.”

Hemserekê Pêroyî yê HDP’yî Sezaî Temellîyî  ard ziwan ke, zaf zelal û eşkera yo ke çareserîya promlemê Kurdan de adrese Îmralî û Birêz Ocalan bi xo yo. Temellîyî derheqê weçînayîşê herêmîyan de wina qisey kerd: ”31’ê Adare de îtîfaqê AKP-MHP do birijîyo.”

27’ê Temmuze 2011’î ra nat avukatî nêeşkenê muwekîlê xo Rayberê Şarê Kurdî Abdullah Ocalanî de pêvînayîşan bikerê. Keye zî 6’ê Teşrîna Verêne ya 2014’î ra nat, seba pêvînayîşî xeylî dolimî muracat kerdo, la tena di dolimî cewab dîyayo ci: keyeyî verî 11’ê Êlûle ya 2016’î de, tewr peynîye de zî 12’ê Çele ya 2019’î de  Ocalanî de pêvînayîşî kerdî. Çalakîya hemsereka KCD’yî û parlamentera HDP’yî Leyla Guvene ya ke seba ke tecrîdê serê Rayberê PKK Ocalanî bêro wedaritene zî 8’ê Teşrîna Peyêne ya 2018’î ra nat dewam kena.

Hemserekê Pêroyî yê HDP’yî Sezaî Temellîyî derheqê tecrîdê serê Rayberê Şarê Kurdî Abdullah Ocalanî û derheqê grevê vêşanîye yê Leyla Guvene û derheqê weçînayîşê herêmî yê 31’ê Adare de ANF’yî rê qisey kerd.

MUXATAB OCALAN O

Temellîyî derheqê tecrîdê giranî yê serê Ocalanî de va nîşanê bêhiqûqîye yê Tirkîya yo û va, Tirkîya xeylî wexto ke hiqûq ra vejîyaye teber û qanûnanê xo nêşinasnena û derheqê binpaykerdişê heqanê merdiman de resta asta tewr core. Temellîyî wina qisey kerd: ”Tecrîd, Tirkîya de çimeyê bêhiqûqîye yo. Tirkîya de problemo tewr pîl problemê Kurdan o. Muxatabê problemê Kurdan zî Birêz Ocalan o. Problemê Kurdan ke nêro çareserkerdene, qet yew problem çareser nêbeno. Ganî çareserîya problemê Kurdan, her çiyî ra ver bêro girewtene. Çareserîya problemê Kurdan, problemanê binan rê zî rayîrê çareseryîye a kena. Ewro tecrîd sînoranê Îmralîyî ra derbaz bîyo û pêroyê komelê Tirkîya binê tecrîdî de yo. Ganî no tecrîd bêro şikitene. Qet yew waştiş teberê hiqûqî de nîyo, pêro talebî çarçewaya hiqûqî de yê. Tirkîya hiqûqê mîyandewletîyî binpay kena.”

QERARÊ KONSEYA EWROPA Û CPT’YÎ DIRÎTÎ YA

Temellîyî derheqê bêvengîya CPT’yî de zî wina qisey kerd: “Ma tena Tirkîya de rastê bêhiqûqîye nênê, mîyanneteweyî de zî ma rastê bêhiqûqîye û bêedaletîye yenê. Tirkîya de pêro rayîrê hiqûqî ameyê girewtene û xitimnayê. Mehkemeyan bêhetîya xo kerda vîndî û edalet dewre ra vejîyayo. Ma seba hiqûqê mîyandewletîyî îmza eşta û ma hiqûqê mîyandewletîyî ra hiqûq pawenê. Sazî û dezgeyê Meclîsê Parlamenteran ê Ewropa estê û ganî nê sazîyî bikewê dewre û wezîfeyê xo bîyarê ca. Meclîsê Parlamenteran ê Ewropa xeylî welatan de, seba çareserîye keweno dewre la çîyo balkêş o yo mijar ke Tirkîya bo bêveng maneno. Qerarê Konseya Ewropa û yê CPT’yî dirîtî ya. Ganî na dirîtîye ra fek vera bidê û wezîfeyê xo bîyarê ca.

LEYLA GUVENE BI VENG Û VINDERTIŞÊ XO QÎRÎNÊKA PÎLE YA

Ganî qîrîna Leyna Guvene bêro heşnayene. Leyla Guvene bi beden û vindertişê xo qîrînêk zaf pîle ya û îmkanê  ci çin o ke merdim nê qîrayîşî nêheşno. Roja 105’ine de ez şîya zîyaretê Leyla Guvene, ewro zî kewta roja 108’ine û astêka zaf krîtîke de ya. Ez nêwazena ke qet yew embaza/ê ma grevê vêşanîye de bimiro. Nika ra nêweşîyê zaf giranî embazanê ma de peyda bîyê. Ez reyna û dolimêna venga Wezîrê Edaletî dana ke wa tecrîdî wedarnê. Na bêhiqûqîye ver do merdimî bimirê. Şima nêeşkenê nê qîrayîşan ver goşanê xo bikerê kerr. Vengê Leyla Guvene pêroyê dinyaye de bîyo vila. Teba Leyla Guvene 317 kesî grevê vêşanîye de yê. Talebê înan demokrasî û edalet o. Ma wazenê ke wa edalet bibo. Ganî erey nêkewo, her saet û deqa ma erey kewenê. Êdî roje, saet û deqa muhîmî nîyê. Bêrê daxîlê na babete bibê û ma pîya polîtîkaya tecrîdî wedarnê.

KOMELÎ PARÇE MEKERÊ

Tirkîya rewşêka zaf xirabe û bê ewlehîye de ver bi weçînayîşê herêmîyan şona. Îqtîdar wexto ke meşruîyetê xo ke bikero vîndî, dest erzeno ray û raybazanê bînan. Senaryoya xo şarî rê keno ferz. Bi hêzanê xo yê ewlehîyan derûdorê sindoqan de bi hawayê terorî têgêreno. Heyetê Berzî yê Weçînayîşî sazîyêka fermî ya dewlete ya û ganî girêdayîyê qanûnî bo, la çi heyf ke qanûnan binpay keno. Îqtîdar şewdir ra heta şan HDP’yî rê gefan waneno, hêriş keno û bi rika xo HDP’yî sey dişmen dano şinasnayene. Bi ê vatişan û polîtîkayan şarî yewbînan ra visneno û wazeno ke nê hewayî de şoro weçînayîş. Ez her tim wina vana, şima ke wazenê yew welatî parçe bikerê, verî şarî parçe bikerê. Şarê Kurdî sey dişmen nîşan medê û Tirkîya parçe mekerê.”

HDP PARTÎYA PÊROYÊ ŞARANÊ TIRKÎYA YA

Temellîyî dewamê qiseykerdişê xo de va, HDP partîya pêroyê şaranê Tirkîya ya û wina dewam kerd: ”Îqtîdar keno ke HDP’yî terorîze bikero û naye ser zî vano HDP partîya Tirkîya nîya. La HDP her kesî ra hîna zêde wayîrê Tirkîya vejîno. HDP partîya pêroyê şaranê Tirkîya ya. HDP’yî barê demokrasî û haştîye yê nê welatî girewto xo ser. Îhtîyacîya Tirkîya bi haştîye, hiqûq, edalet û demokrasîyî esta. Reyna bêkarîye, problemê cinîyan, kiştişê cinîyan, qedexeyê grev û çalakîyan estê û merdim ke ewnîyeno xeylî problemî kewenê têrêze. HDP nê pêroyan rê wayîr vejîno û wazeno ke nê problemî bêrê çareserkerdene. Îqtîdar se keno? HDP’yî keno sûcdar û komelî yewbînî ra visneno û keno parçe. Sey nimûne, Tirk û Kurdan, Elewî û Sunîyan yewbînî ra visneno. Bi dişmenîye û yewbînîravisnayîşî keno ke emrê xo bikero derg.

ÎTÎFAQÊ AKP-MHP’YÎ DO BIKERO VÎNDÎ

31’ê Adare de ma do her kesî ferasetê qeyûman ra bikerê azad. Tena cayê ke qeyûmî ameyê tayînkerdene nê, her ca de bibê îqtîdar û demokrasîyê herêmîyî awan bikerê. Cayo ke ma bi hêzê xo nêrê îqtîdar de zî, seba ke AKP bikero vîndî, ê cayan de zî ma do paştdarîye bidê bloqê demokrasîyî. Ma komelî rê yew rayîr akerd. Ma do komelî destê sîstemê tekkesî ra bixelesnê.”

ÎQTÎDARÎ MUŞRUÎYETÊ XO KERDO VÎNDÎ

Temellîyî peynîya qiseykerdişê xo de bale ante gefanê Serekkomar Erdogan û Wezîrê Karanê Zereyî Suleyman Soyluyî ser û wina va: ”Sîyasetmedar ganî se bikero û se nêkero? Cewabê naye qiseykerdişê Erdogan û Soyluyî de vejîno meydan. Ganî sîyasetmedarî bibê mîmarê haştîya komelkîye. Ganî sîyasetmedarî seba haştîya komelkîye bixebetîyê. Ganî komelî her het ra bikerê xo virare û komelî bîyarê têhet. Ganî vatişanê dişmentî û nefretî nîyarê ziwanê xo ser. Ancax o wext haştîye û demokrasî ra yeno qalkerdene. La serekwezîr yan zî wezîr, kam ke qisey keno hêrişê HDP’yî keno. Çira? Çunke nêzanê siyasetî biafernê. Merdim ke afernayîşê sîyasetî ra ke kewt dûrî, o wext çîyo ke seba karê şarî bikero nêmendo êdî. Îhtîyacîya komelî bi haştîye, asanîye, hiqûq, edalet û seypêyîye esta. Îqtîdarî meşruîyetê xo kerdo vîndî.”