Walîyê Xarpêtî hetkarîya HDPyî nêgirewte bajar!

Malmzemeyê hetkarîyê yê ke semedê paştdayîşê şarê Xarpêtî yenê şawetene peyser yenê açarnayene.

Goreyê zanayîşanê peyênan êyê ke erdlerzê Xarpêtî de merdî hûmara înan resaye 35 û 1600 kesî birîndar bîyî.

Walîyê Xarpêtî bado ke heyetê HDPyî 60 dewî zîyaret kerdî keyayanê 60 dewan rê telefon kerd û ê hîşyar kerd ke wa têna hetkarî AFADî bîgêrê. Walîyî talîmat da ke wa hetkarîyanê bînan qebûl mekerê. Ame zanayene ke waltîye qerar girwt ke hetkarî do AFADî ser ra bêro vilakerdene.Heyetê HDPyî da bi zanayene ke 60 dewan rê hetkarîye nêbîya û hetkarîya ke resaya a zî merdimanê AKPyijan rê vila bîya. Şaredarîya Erxenî ya Amedî di kamyon hetkarî şawit Xarpêt la dekewtişê bajarî de hetê polîsan ra peyser ameyî açarnayene. Polîsan vat talîmatê walî esto ma destûr nêdanê şima bikewê bajar.

HDP: Hukmat Kewto Kayanê Sîyasîyan Dima

HDPyî bi eşkerayîyêk vera tewirê walîyê Xarpêtî nerazîbîyayîş ramot. Eşkerayîye de ame vatene: ''Wexto wînayên de zî îqtîdar kewto kayanê leyminan dima.  No dej dejê ma pêrûnan o. Wextê hesabanê hurdîyan ê sîyasî nîno. Îqtîdar ganî ca de nê kerdişan û astengîyan ca verdo. Îqtîdarî xora verê erdlerzî tedbîrî nêgirewtî nika hesabanê xo yê sîyasîyan erzenê vernîya asayîşê gan û malê şarî.''

Kampanyayê Hetkarîye

Hetêk ra îqtîdar vernîya hetkarîye gêno hetê bînî ra zî  kampanyaya paştdayîşî dewam kenê. Rêxistina HDPyî ya Silopî ya Şirnexî kampanyaya paştdayîşê şarê Xarpêtî daye destpêkerdene. Reyna Amed de zî hetê DTSO û DTByî ra kampanyaya hetkarîye ameye destpêkerdene.

Cenazayî Ameyî Definkerdene

Hetê bînî ra hîrê cenazayê ke ewro Xarpêt de binê engazî ra vejîyayî înan ra cenazayê cinî û camêrd Berna-Enes Sertdemîrî Goristanê Gulmezî de ameyî definkerdene.Cenazaya  babîyê Berna Enes, Aslan Cengîzî seba ke cinîya ci hema binê enkazî de ya morg de yena pawetene. Reyna semedê Aîşe û mêrdeyê ci Mehmet Afrifoglu û kênaya înan Halîme Aslan û tornê înan Mîraç Alî (12) û Ruya Aslanî yê ke taxa Sursuru de binê enkazî de merdî Camîya Kişla merasîm ame kerdene. Semedê Muzeyyene Ayken û Zehra Ayken zî Camîya Haci Fethî de merasîm ame kerdene. Huseyîn û Onur Yildiz de zî dewa Erba de bi merasîmêk ameyî definkerdene.