Xoverdayoxê Zîndanan: Umidê ma gird o ma do ser bikewê

Zîndanê Tokatî ra 4 xoverdayoxan ê ke 5‘ê Sibate ra grevê vêşanîye de yê da zanayene ke çalakîya înan bi qerardarîya girde dewam kena û heta bicaardişê waştişanê înan ê do dewam bikerê.

Grevê vêşanîye yê ke semedê wedartişê tecrîdê serê Rayberê Şarê Kurdî Abdullah Ocalanî hetê hemsereka KCD’yî û parlamentera HDP’yî ya Colemêrgî Leyla Guvene ra ameyî destpêkerdene, Zîndanê Tokatî ra 4 tepişteyî zî tewrê ci bîyî. Xoverdayoxan ra Hasan Salik û Mehmet Emîn Ogurî bi mektuban da eşnawitene ke ê 5’ê Sibate ra girevê vêşanîye de yê.

Xoverdayoxan ard ziwane ke moralê înan ca de yo û nê parê kerdî: ‘‘Ma bi qerar ê ke ser bikewê. Xora bê serkewtişî ma yewna alternatîf zî nêşinasnenê. Rayberîye vatêne  ke’Umid serkewtişî  ra hîna erjaye yo‘. Hem umid hem zî bawerîya ma zaf  gird a. Ma zaf keyfweşê ke ma semedê merdimo azad û ameyoxê xo çîyêk kenê. Ma zerrîweş ê û heyecanê ma gird o.

Seke yeno zanayene çalakîya grevê vêşanîye hetêk ra zî raywanîya merdimî ya zereyê ci ya. Bi na wesîleya kes eşkeno hîna baş bifikrîyo, xo bîvîno û bireso heqîqet, merdimo azad û kesîya azade. Heta nika rîyê grevê vêşanîye ra problemêko cîddî ma nêciwîyayê. Binê vînkerdişê kîloyî esto la rewşa ma hol a.  Ma heme embazê ke grevê vêşanîye yê Strasboûrgî de silam kenî û vanê ke heta ke waştişê Leyla Guvene bêro ca ma do bi qerarîya girde grevê vêşanîye rê dewam bikerê.