Yemen de 5 mîlyon domanî tehluke de yî

Rêxistina bi nameyê Save th Chîldrenî ya îngilizan ke heqê domanan pawena, raporêk aşkere kerd û rapor de dîyar kerda ke Yemen de 5 mîlyon ra zêde domanî tehlukeyê vêşanîye reyde têrî yî.

Rêxistina Save the Chîldrenî raporê xo de dîyar kerda ke Yemen de vêşanîya ke qet nimuneyê ci çin o, yena cuyayene. Goreyê Milletê Yewbîyayeyî zî krîzo tewr giran yê merdimîye no welat de yeno cuyayene.

Mudirê Pêroyî yê Save the Chîldrenî Helle Thornîng-Schmîdtî babete ser o wina va: “Mi vakurê Sûrîye de nêweşxaneyêk zîyaret kerd û ewja de domanî hende zeyîf bîyî ke nêşênî bibermî. Bedenê înan zaf rincan bibi.”

Goreyê Fonê Domanan yê Milletê Yewbîyayeyî (UNÎCEF), şerê Yemenî de pêro pîya 2 hezar 200 domanî merdî.

Koalîsyonê Ereban ke rayberîya ci Erebîstanê Seudî keno, roja dişeme vera Hudeyde ke bajarêko stratejîk o de operasyon dabi dest pêkerdene. No bajar eynî wext de cayê kewtişê hetkarîyanê mîyanneteweyîyan o zî. Operasyon şîyayîşê hetkarîyan zî erzeno tehluke mîyan.

Tebaxa 2014î ra nata Yemen de şer esto. Paytext Sana û herêmêka hîra destê Husîyan de yî. Koalîsyonê Ereban adara 2015î de mudaxaleyê Husîyan kerd û şer hîra bi. Netîceyê nê şerî de krîzêkê merdimîye yeno cuyayene. Nufûsê Yemenî 22 mîlyon o û se ra 75ê ci lazimîya înan bi hetkarî û pawitişî esta.

Vêşanî, feqîrî û nêweşîya Kolera ver heta nika bi hezaran kesî merdî. Nika sucê şerî yenî kerdene û goreyê Milletê Yewbîyayeyî heta nika nizdîyê 10 hezar kesî merdî û 53 hezar kesî zî birîndar bîyî.