Çêrmûge de 7 keyeyî binê karantîna de yê

Taxa Bistinî ya Çêrmûge de 7 keyeyî gerîyayî binê karantîna. Dekewtiş û vejîyayîşê keyeyan qedexe yo û kuçeyo ke vejîyeno Mudirîya Asayîşî û Keyeyê Hukmatî trafîkî rê qefilîya.

Taxa Bistinî ya qezaya Çêrmûge ya Amedî de kesêk de vîrusê Korona ama tesbîtkerdene. Karkerêko ke taxa Bistinî de viraştişê camîyî de xebitîyayêne dima ke nêweş kewt şi nêweşxane û testê ci yê Korona pozîtîf vejîya. Karker Amed de nêweşxaneyêk de yeno weşkerdene. 7 keyeyê ke karkerî temasê ci kerd gerîyayî binê karantîna. 

Verê 7 keyeyan de notirî vindenê û destûr nêno dayene ke hemwelatîyî bivejîyê teber. Ame zanayene ke hemwelatîyan rê testê vîrusê Korona nêame kerdene, ekîpmanê pawitoxî yê sey maske, lapik nêameyî dayene. 

Dewlete hêverî seba xo tebdîr girewt

Taxe de dekewtiş û vejîyayîş serbest o, têna cendirmeyî dekewtişan de pê peymitoxanê germîye kontrol kenê. Kuçeyo ke vejîyeno Mudirîya Asayîşî û Keyeyê Hukmatî trafîkî rê ame girewtene.  

 Roniştoxê taxe qerqilîyenê ke vîrus do vila bibo. Roniştoxêk/a ke nêwaşt nameyê xo eşkera bikero/a îfade kerd ke Çêrmûge de semedê herê sipîyî ra cara nêweşîya asbestî (tengîya nefesî) xeylêk a û eke Korona vila biba zaf mergî do bêrê meydan. Roniştoxî/e ard ziwan ke sey maske, lapikî ekîpmanî hema nêameyî dayene û test nêame kerdene.  Roniştoxî/e eşkera kerd ke înan rê ame vatene ke wa qasê 10 rojan wa nêvejîyê teber la hewcedarîyê înan nêameyî peydakerdene.