Çîn de 40 mîlyonî ra zafêr kesî gerîyayî binê karantîna

Bado ke Rêxistina Weşîye ya Dinya (WHO) eşkera kerd ke semedê îlankerdişê rewşa lezkanîye ya mîyanneteweyî hema rew o Çîn de rewşe hîna xidar bîye. 40 mîlyonî ra zafêr kesî gerîyayî binê karantîna.

Çîn de 40 mîlyonî ra zafêr kesî gerîyayî binê karantîna.Goreyê bîlançoya fermî vîruso ke  menga kanûne de merkezê welatî Wuhanî de vejîya werte pêro pîya resa 830 kesan û 26 kesan rîyê nê vîrusî ra cuya xo vînî kerde.

Seba ke 25ê çeleyî yo ke serrneyê Çînî yo û bi mîlyonan kesî serra neweye de cayê xo bedilnenê yeno qesawetkerdene ke vîrus zaf vila bîyo. Berpirsîyaran Wuhano ke nifusê ci 11 mîlyon o roja pancşemeyî girewt binê karantîna. Şarê bajarî tersê vîrusî ra keyeyanê xo ra nêvejîyeno. Trenî ameyî vindarnayene û otorayîrî ameyî qefilnayenê. Goreyê medyaya mîyanneteweyî herêma Wuhanî de 13 cayanê roniştişî de tekîlîya bi dinya biryaye. Nê cayan de 41 mîlyon kesî ciwîyenê.

Rêxistina Weşîye ya Dinya (WHO) ya ke derheqê babete de Cenevre de laz û bez ameye têhet eşkerayîyêke daye û vat ke semedê îlankerdişê rewşa lezkanîye ya mîyanneteweyî hema  rew o. Goreyê WHOyî hema vîrus nêvejîyo teberê Çînî. Koalîsyonê Amadekarîye yê Vera Janan da zanayene ke înan wextê Formê Ekonomî yê Davosî de vera vîrusî dest pê testan kerd û aşiyo verêne do heta wisar bêro amadekerdene. Hetê bînî ra yeno vatene ke virus xeylêk herêman ra vila bîyo. Welatanê sey Hong Kong, Macao, Tayvan, Koreya Başure, Japonya, Tayland, Sîngapur û Vietnamî yê Asya û DYA de vîrus ame tespîtkerdene.