Aqibetê Morsumbulî ame persayene: Ma têkoşînê dayîka xo domnenê

Birayê Huseyîn Morsumbulî Şahîn Morsumbulî vat: ''Dayîka mi 36 serrî gerayî birayê mi. îşkence dî, erdî ra ameye kaşkerdene, ameye destbendkerdene. Nika ma lajanê aye têkoşînê ci dewr girewt.''

Mayanê  Şemeyî seba aqîbetê merdimanê xo pers bikerê û kiştoxê înan bêrê cezakerdene çalakîya xo ya 808ine viraşte. Rîyê Korona ra çalakî medyaya sosyale ser ra ameye kerdene. No hefte aqibetê Huseyîn Morsumbulî yo ke 18ê Êlul a 1980yî de bi destê dewlete ame vînîkerdene, ame persayene.

Eşkerayîye de hêver Huseyîn Morsumbulî Şahîn Morsumulî qisey kerd. Morsumbulî vat:  ''18ê êlule de leşkeran eşt keyeyê ma ser û birayê mi destbend kerd. A roje nata rixmê heme cigêrayîşê ma ey ra xeberêke nêameyî girewtene. Dayîka mi 36 serrî gerayî birayê mi. îşkence dî, erdî ra ameye kaşkerdene, ameye destbendkerdene. Nika ma lajê aye têkoşînê ci yo ke dewr girewtî, danê domnayene.''

Dima ra avûkata Morsumbulî Hemsereka pêroyî ya ÎHDyî Erene Keskîn qisey kerd. Keskîne vist vîrê  ke destpêkerdişê çalakîya Mayanê Şemeyî ra nata a avûkatîya Morsumbulî kena û vat: ''Cigêrayîşî edaletî de ma pê hesîyayî ke Huseyîn Morsumbul seba ke leşkerîye nêkerda hemwelatîye ra ameyo vetene. 2012 de Serdozgerîya Komare ya Çewlîgî cigêrayîşêk da despêkerdene. Dozgerîye qerarê bêteqîbîye girewt û vat binpaykerdişê heqê cuya de wextvîyartiş nêben la îmkanê arêdayîşê delîlanê qîmkerdeyan çîno. Ma zî vera naye vejîyayî. Ma  vat delîlê ma yê newe estê û newe ra muracat kerd la hema cewab nêdîyo ma.''

Bi nameyê Mayanê Şemeyî zî no hewte eşkerayîye hetê merdimanê şemeyî ra Arz Ocak ra ameye wendene. Ocake bale ante ser rixmê heme xîretkerdişê înan ê nêresenê merdiman xo û edaletî û vat:  ''Badê destbendkerdişê Huseyîn Morsumbulî  dayîke û babîyê ey Fatma û Hanefî Morsumbul şîyê dozgerîya leşkerî û îfade da, gerayê sucdarî kerd la çîyêk nêame kerdene. Avûkatanê ÎHD'yî serra 2011 de eşkerayîya sucî ya newîye Serdozgerîya Komare ya Çewlîgî rê kerd, dima cigêrayîş dest pêkerd. La seba ke serebûtî ra pey zaf wext vîyarto derheqê dosya de qerarê 'hewcedarîya taqîbkerdişî çin a' ame girewtene. Keyeyî 2015 de îtîrazê ci kerd la hema zî çîyêk eşkera nêbîyo. Mesuldarê vînîkerdişê Huseyîn Morsumbulî Fermandarê Blokê Jandarma yê Merkezî yê Şaristan ê Çewlîgî Durmuş Coşkûn Kivrak, Fermandarê Alaya Şaristan ê Çewlîgî Beşîr Akin û pêro aktorê Derbeya 12ê Êlule yê. Çend serrî verêne wa ravêrî semedê Morsumbulî û heme vînîkerdeyanê ma do cigêrayîşê ma yê edaletî dewam bikero.''