Avesta: Ganî şarê ma bi ruhê Cengê Heftanînî tewrê hemle bibo

Sozdar Avesta ke derheqê Hemleya 'Tecrîd, Faşîzm, Îşxalî rê Bes o, Wext Wextê Azadîye yo' ya KCKyî de qisey kerd vat: ''Ganî şarê ma bi ruhê Cengê Heftanînî tewrê hemle bibo.''

Endama Konseya Hemserekîya Pêroyî ya KCKyî Sozdar Avesta Hemleya 'Tecrîd, Faşîzm, Îşxalî rê Bes o, Wext Wextê Azadîye yo' ya KCKyî û kayê leyminê ke demo peyên de Şingal de yenê kaykerdene ANFyî rê ecnayî.

Avesta vat: ''Têgêrayîşê azadîye prosesêko zaf muhîm de hamle îlan kerde. Beşik o na hemle zaf muhîm a. Kurdîstan û herême de vera şaran hêrişê qirkerdişî dewam kenê. Rejîmo faşîst ê Erdogan û Bahçelîyî herême tehlukeyo pîl o. Ganî hînî no tecrîd û faşîzm bêro şiktene. Rejîmo faşîst bi caardişê tecrîdê Îmraliyî wazenê ke emrê îqtîdarê xo bikerê derg. Rayber Apo sey artêşêke vera nê faşîzmî têkokîn keno. Eke heta ewro rejîm hedefê xo nêardî ca naye de rolê Rayber Apoyî pîl o. Nê semedî ra hînî wextê azadkerdişê Rayber Apoyî yo ke hemle zî coka ameye destpêkedene.

Sîstemê 12ê Êlule ke pê Xoverdayîşê Zîndanê Amedî ame vilakerdene, hetê hêzanê komplokaran ra 1999 de hîna aktîf bi û ewro hetê rejîmê AKP-MHPyî ra yeno domanyene. Vera naye hemleya ke 12ê êlule de ameye destpêkerdene zaf muhîm a. Badê îlankerdişê hemle demo kilm de bicoş ameye wayrîvejîyayene. Na hemleya her kesî ya, her kes eşkeno xo tede vîno.

Hêrişê tacîz û tecawuzî dewam kenê. Hêrişê cinî, doman, ciwan û kultrurê şaran dewam kenê. Cinîyî hînî nêeşkenê kuçeyan de têna bigêrî. Cinîyî ganî wayîrê hemle bivejîyê. Têna cinîyê kurdî nê heme cinî ganî hemle de cayê xo bigerî û vajê 'qirkerdişê cinîyan û faşîzmî rê beso, wext wextê azadîye yo.' Reyna şarê elewî û ezîdî û şarê bînî yê herême binê tehlule de yê. Coka ganî heme şarî paştî bidê hamle. Têna eşkerayîye qîym nêkenê. Çalakîyê cîyayî hewce kenê. Ganî bi ruhê 14ê Temmuze û Cengê Heftanînî û bi bawerîya şehîdanê ma yê ke bi şîarê 'Şima nêeşkenê tîja ma tarî bikerê' vera komplokaran vejîyayî, 7î ra heta 70 serreyî her kes tewrê hemle bibo.''

Şingal de kayê pîlî yenê kaykerdene

Avesta bale ante serê kayanê ke demê peyênî de Şingal de yenê kaykerdene ser û vat: ''Vera Şingalî komployêk yeno amadekerdene. Wextêk verê cu Wezîrê Karanê Teberî yê Amerîka eşkerayîye daye û vat: Ganî Iraq, PDK û Tirkîya ma dir têbigêrê ke hêzê ke meşru nîyî ma Şingalî ra vejê.‘ No destpêkedişê pratikerdişê komplo bi. Nê hêzî wazenê ke çîyo ke DAÎŞ 2014 de nêşeka bikerê ê bi xo bikerê. Hêrişê vera Şingalî dewam kenê. Şar kampan de esrî yeno girewtene. Rayberê şarî yenê qetilkerdene. Mam Zekî ra heta embaz Zerdeştî rayberê şarî hedef girewtî.

Bi perspektîfanê Erdogan û çeteyanê ci vera Şingalî kayê bêehleq û bêvîjdan yenê kaykerdene.Tewr peynî de eşîrê Şemmarî ra di kesî şehîd bîyî. Dima ra kincê endamanê asayîşê Ezidxanî eştê ser keyeyanê şehîdan û eşîrê Hebabî yo erjîyayeyî ra çar kesî tepiştî. Nê kayî verê çiman de yê. Komelê êzidî û ereban nê kayan vînenî. Eşîrê Şemmarî dostê komelê êzidîyan o û wextê fermanê DAÎŞî de vera çeteyan pîya bi têgêrayîşê azadîye şer kerd. Ciwanê înan YBŞ, YJŞ û asayîşê Ezidxan de ca genê. Wazenê ke şarê Şingalî erdê ci ra biremne, coka eşîrê Şemmarî hedef ame girewtene. No sîyasî û îdeolojî yew komplo yo. Wazenê nê eşîran biverdê pê û înan zayîf bikerê ke erdê înan destê înan ra bîgerê. Ganî komelê êzidîyan destur medo ke ajan û xayînî mîyanê înan de biciwîyê û kayanê leminan rê mexapîyo.

Meclîsê Şingalê Demokratîk û Xoserî têna ê êzidîyan nê yê heme şarê Şingalî yo. Eşkerayîya înan zî zaf erjîyaye bî. Reyna tewirê eşîrê Şemmarî ke şehîdê înan estê zaf makul bî. Eşkerayîye de vat: 'Wazenê ma biverdê yewbînan. Ma pîya yê pîya têkoşîn kenê. Ma vera faşîzm, neheqîye û komplo yê' bi na wesîle ez wird hetan zî semedê tewirê înanê ejîyayeyî pîroz kena selamanê xo şawena.''