Bedia Akkaya: Semedê cinîyan her ca tecrîd o

Meclîsê Cinîyan ê HDPyî ra Bedia Akkaya bale ante ser ke semedê cinîyan her ca tecrîd o û vat ê do hînî qala têkoşîn û çareserî bîkerê.

Meclîsê Cinîyan ê  Partîya Demokratîke ya Şaran (HDP) ra Bedia Akkaya derheqê polîtîkayanê dewre neweyî yê meclîsî de ANFyî rê qisey kerd.

Akkaya vist vîrî ke rejîm semedê dewamkerdişê îqtîdarê xo polîtîkayanê hêrişkaran rayra beno û vat: ''Bi medotanê zafhetinan her hetî ra hêrişê cinîyan kenê. Hêrişê heqîqatê cinîyan kenê. Bi argumanê îdeolojîk, polîtîk û stratejîkan hêrişê estbîyyayîş cinîyan û heme raameyîşanê komelkî kenê. Tewr zaf zî destketeyê cinîyan ke bi bedelena pîlan ameyî destfînayene hêrişê înan kenê. Polîtîkaya nê konseptî yo ke dewre de yo bi şerê psîkolojîk û îdeolojîkî cinîyan bêhez biverdo û teslîm bigero.''

Akkaya ard ziwan ke cinîyî binê tehlukeyê pîlî de yê û wina dewam kerd: ''Mekanîzmayê ke cinîyan pawenê yew bi yew yenê çînkerdene. Cinîyî gerîyênê binê tecrîdî. Semedê cinîyan her ca tecrîd o. Cinîyî hem hetê şerî ra rewşa tecrîdî ciwîyene hem zî bi KHKyan karê ci ra bîyî, heme heqê înan ameyî binpaykerdene û keyeyan rê ameyî qefilnayene. Bi hezaran cinîyî ke herra xo ra bi sebebanê cîyayan vejîyayî welatê ma de sey multecîyan vêşan têşan binê tehlukeyî de yê. Goreyê hûmara fermîye 5 mîlyon cînîyî bêkar ê. Wazenê ke cinîyan bi vêşanîye terbîye bikerê.''

Akkaya bale ante ser ke şîdet, qirkerdişê cinîyan, tacîz û tecawuzê vera cinîyan çend şino zafêr beno û vat: ''Ma sey Meclîsê Cinîyan ê HDPyî do vera înan xebatan bikerê. Cinîyî wextê pandemî de zî nêvindetî, tekoşînî rê dewam kerd. Prosesê verê ma de ma do têkoşînê cinîyan ê hemparî esas bigerê û goreyê naye çalakîyan virazê. Vera şer, tecrîd û polîtîkayanê qeyûmkîyan cinîyî û Meclîsê Cinîyan ê HDPyî do tim payra bê. Seba ke hêzê ma ra tersenê hêrişê sîstemê hemserekîye kenê. Sîstemê me yew merdimî û polîtîkaya ci têşaneno. Ma hînî têna qala mexdurîyetî nê qala têkoşînê bitesîrî û çareserî do bikerê. Meclîsê cinîyan problemî sey perpektîfê çareserî girewtî destê xo.''