Hemsereka Pêroyî ya Partîya Demokratîke ya Şaran (HDP) Pervîne Buldan kombîyayîşê xo yê partîya xo yê meclîsî de babetê rojdemî ercnayî.

Ercnayîşanê Buldane ra beşêk wina yo:

''Ma erdlerzî ra dima cade masaya krîzî û heyetêk amade kerd. Heyetê ma tesbît kerd ke hema hetkarîye nêresaye 60 dewan.

Ma şarê xo reyde kewtî rewşa seferberîye la hetkarîyê ma ameyî astengkerdene. Îqtîdar hetkarîya komelî ra tersa. No seba merdimîye şerm o. Ma naye erdlerzê Wanî de zî dî. Ganî erdlerzan de merdimî hîna zêdêr bibê yew û hetkarîya yewbînan bikerê. La îqtîdar cîyatîye keno. Erdlerz de herinda ke birîndarî biameyêne berdene bi nêweşxaneyan ameyî berdene bi hetê Serekomarî. Ma serekkomar bi hawayêkê pîtî şermezar kenî. No şerm o, gune yo, eyb o.

Bi efûya îmarî bînayê qeçaxî ameyî viraştene. Eke Îstanbul de erdlerz bibo 2000 hezar keyeyî do bêkeye bimanê. Pê vatişê ''qeder o'' na mesele safî nêbena. Ma waşt ke serra 2020î biba serra hîşyarîya erdlerzî la meclîsî waştişê ma red kerd.

Des serrî bi erdlerzan vîyartî la îqtîdarî ci ra ders nêgirewt. Ganî şar derheqê erdlerzî de bêro perwerdekerdene. Sey HDPyî ma do xebatê paştdayîşê komelî dewam bikerê. Ma do vera polîtîkayanê parçekerdişî û cîyakerdişî yê AKPyî pîya biciwîyê û ma paştdayîşê bi yewbînan xurt bikerê. Ekenomî, edalet rijîyayî. Xizanî û bêkarî asta tewr berze de yê. Tecrîd, gef, şîdet û teda her roje verê ma de yê. Bi polîtîkaya qeyûmî wazenê ke welat îdare bikerê la hînî nêeşkenê. 

Nika çekan danê notiran, faşîzmê notiran virazenê. Ez venga pêro wekîlan danê ke eke seba vernîyazê notiran vajê heya ganî wekîlîye û parlamentoyî ra fek vera bidê û şorê notirîye qesre bikerê. Heta ke HDP bibo çareserîye zî bena. Ma venga her kesî danê ke îtîrazê xo xurt bikero û xo rêxistin bikero. Ma heta nika ser kewtî û ma reyna do ser bikewê."