Dage: Ziwanê dayîke ganî her çî ra ver bêro

Wekîla HDPyî ya Amedî Dersime Dag îfade kerd ke ziwanê dayîke ganî seba kurdan her çîyî ra verî bêro û vat: ''Wayîrvejîyayîşê ziwanê xo, pûçkerdişê polîtîkayanê asîmîlasyonî yo.''

HDP 21ê Sibate Roja Ziwanê Dayîke ya Dinya (ewro) de mîyanê xo de seferberîya musayîşê kurdkî dano destpêkerdene.
Wekîla HDPyî ya Amedî Dersime Dag derheqê kampanyaya kurdkî ya HDPyî de ANFyî rê qisey kerd. Wekîle Dersime Dag zî bo xo mîyanê Komîsyonê Kurdkî de ca gêna.

Dersime Dag pare kerd ke polîtîkaya asîmîlasyonî sûcê merdimîye yo û vat: ''Dewlete pê asîmîlasyon û qedexeyan xîret kena ke ma çin bikera. Coka wayîrvejîyayîşê ziwanê ma wayîrvejîyayîşê estbîyayîş, kultur û hunerê ma yo. HDPyî seba kurdkî xerîtayêka hîra pare kerde. Ziwanê dayîke ganî seba kurdan her çîyî ra verî bêro. Ma na çerçewe de komîsyonêk awan kerd û destpêk de îdarekarê ma perwerdeyê kurdkî do bivînê. Komîsyon do goreyê peymananê mîyanneteweyîyan tay raporan amade bikero. Pûçkerdişê polîtîkaya asîmîlasyonî hedefê ma yo verên o. Pê wayîrvejîyayîşê ziwanê xo ma eşkenê têkoşînê xo ser bivisnê. Ganî pêro kurdî wayîrê ziwanê xo vejîyê, ziwanê xo bipawê û ziwanê xo aver berê.''