Şahîdanê tarîxê Kurdîstanî û Dêrsimî û dadîya ronayîxanê PKKyî ra Alî Haydar Kaytanî 10 serrî verî şîbî heqîya xo. Gulîzare Kaytan 85 serrî bi xoverdayîşî derbaz kerdî û a bîye sembolanê xoverdayîşî ra yewe.

Gulîzare Kaytan 1ê çeleyê 1929î de Dêrsim de dadîya xo ra bîya. A dewa Hengirvanî ya Merkezê Dêrsimî ra û eşîra Haydaran ra ya. Terteleyê Dêrsimî de keyeyê Gulîzare ra bi desan kesî, eşîra aye ra zî bi hezaran kesî ameybî qetilkerdene. A o çax 9 serre bîye. Keyeyê Gulîzare terteleyî ra dima surgunê Kayserî ame kerdene.

Gulîzare keyeyê xo reyde 1940 de agêraye Dêrsimî û dewa xo de cabîye. A Alî Kaytan de zewijîyena. Înan rê 7 domanî benê. Dewlete tim tedaya Kaytanan kena û keyeyî rehet nêverdena. 

Serranê 1975-1976î de ciwanê cîyayî şinê yenê dewe. Şar vano qey nê ciwanî embazê lajê pîlî yê Kaytanan o. No lajo pîl Alî Haydar Kaytan o. La dima fam beno ke nê ciwanî şorişgêr ê. Dayîke Gulîzare hema destpêkî ra nata paştî dana nê ciwanan.

Aye vatêne: ''Wexto ke mi nê ciwanî dîyî, ma vat ke nê ciwanî do qesasê Dêrsimî bigêrê.'' Dayîke Gulîzare bi nê hawayî ciwananê Apogîran kena verarê xo. Hengirvan beno merkezê ciwanan. 

Darbeya 12ê Êlule de dewlete tedaya keyeyê Kaytanan kena û Gulîzare û Alî Kaytanî rê vana: ''Ya domananê xo bîyarê yan zî şorê.'' Keyeyê Kaytanan Dêrsimî ra yeno vetene û keye Afyon de cabeno. Keye Afyon de zî zaf zehmetî vîneno la ancî zî têkoşînê xo ra fek vera mêdano. Babî Kaytan vano: ''Şima do qetî xizmetê dewlete nêkerê, karmendîye sey îxanetî ya.'' Babî Kaytan 1984 de surgun de dinyaya xo bedilneno

Wefatê Alî Kaytanî ra dima dayîke Gulîzare domananê xo reyde Bursa de cabena. Dayîke Gulîzare domananê xo reyde tewra PKKyî bena.

Gulîzare Kaytan 1990 de agêrena Dêrsimî. 1993 de a yena tepiştene. Zîndanê Erziromî de 6 mengan manena. A 27ê teşrîna peyêne ya 1994î de ancî tepişîyena û zîndananê Dêrsim, Elbîstan û Meletî de manena. Dima a agêrena Bursa. La tîya de zî Mudirê Asayîşî yê Bursa aye destbend keno û îşkenceyê aye keno. Rixmê îşkenceyî zî a qisey nêkenê. Gulîzare xeylê reyî tepişîyena, bi desan reyî yena destbendkerdene la qetî sereyê xo nêana war.

Gulîzare Kaytan 1995 de şina Sûrîye hetê Rayber Apoyî. A qîmet dana Rayber Apoyî coka seba ke ey bivîna bi kelecanî bena. Wexto ke aye Rayber Apo dî kêfê ci yeno ca. Gulîzare kincanê gerîlayan dana xo ra û kêfweşîya xo wina ana ziwan: ''Werrekna ez erey biameyêne na dina û sey kênayanê xo çeke bigirewtêne xo destî, koyan de şer bikerdêne.' Gulîzare 6 mengan tîya de manena û waştişê Rayber Apoyî ser o derbazê Ewropa bena.

A şaristanê Essenî yê Almanya de cabena û tîya de zî nêvindena. Gulîzare Kaytan Ewropa de beşdara konferansan bena û sey şahîdêka terteleyî qisey kena.

Gulîzare Kaydan heta peynîya cuya xo bena parçeyêkê têkoşînê azadîye. 

Gulîzara ke Rayber Apoyî tim zîndanî rê selam erşawitêne ci, bi rayîrê avûkatanê xo dîyarîya ci şawena. Rayber Apoyî vatêne ke dadîyê sey Gulîzare Kaytan û Hatîce Altun qehremanê Têkoşînê Azadîye yê Kurdîstanî yê. Rayber Apoyî vatêne: ''Nê dadîyî seba ma erj ê. Ganî merdimî wayîrê nê erjan vejîyê û perwerê înan bibê.''