Celalettîn Erkmeno ke weçînayîşanê herêmîyan ê 31ê adara 2024î de, namzedê Şaredarîya Riha yê DEM Partî bibi, ANFyî rê qalê xespkerdişê îradeyî û têkoşînê şarî kerd.

Erkmenî îfade kerd ke qeyûmî teyna Kurdîstan de ney, Tirkîya de zî îradeyê şarî binpay kenê û vat: ''No modelê kolonyalîzmî yo. Nika qeyûm tayînê Esenyurtî zî bîyo. Goreyê qanûnan ganî Meclîsê Şaredarîye kom bibo û mîyanê xo de serekwekîlêkî/e biweçîno. La Kurdîstan de endamê meclîsî nêgêrîyenê şaredarîye. Sîstemê dewlete şaran wina îdare keno. Komarêke ganî demokratîk biba. Ma prosesê peyênî de zî ard ziwan ke şarî zî qebul kerd ke Birêz Ocalan seba haştîya mende kesêko girîng o.''

Erkmenî pare kerd ke vera faşîzmî, ganî şar wayîrê îradeyê xo vejîyo û seba ney wezîfeyê girîngî kewenê milê rêxistinanê komelî yê sivîlan. Erkmenî vat ke qeyûmî meşrû nîyê.

Erkmenî bale ante ser ke Hemşaredarê Peyasî Cengîz Dundar ameyo destbendkerdene û vat: ''Sîstemê xo vurnenê. Beno ke no destpêko newe bo. Înan hesab kerd ke nêrazîbîyayîşê vera qeyûman do çend rojekan dewam bikerê. La nêrazîbîyayîşî vila benê. Beno ke destbendkerdişê embazê ma taktîkêko newe bibo. Şarê Amedî do wayîrê îradeyî û hemşaredarê ma vejîyo. Hinî şar ferasetê qeyûman qebul nêkeno. Nika ra pey çîyêko zêde nêmendo ke ê bikerê. Aqîbetê înan do sey ê bînan sey ANAP û DYPyî bibo. Şarê ma do faşîzmî çin bikero.''