'Heta hela peyêne zî şarê xo fikirîyayêne'

Gerîla Adîl Amedî serrgêra şehadetê înan de Şîrîn Elemhûyî, Ferzad Kemanger, Alî Hayderyan û Ferhad Wekîlî yad kerdî û vat: ''Ma do her tim rêçê înan de bibê.''

Adîl Amedo ke wextêk Şîrîn Elemhûyî reyde têkoşîn kerd, seba Elemhûyî vat: ''Embaze Şîrîne sembola xoverdayîşê Rojhelatî ya.''

Adîl Amedî vat: ''Serra 2010î de embaz Ferzat Kemanger, Şîrîn Elemhûyî, Elî Heyderyan û Ferhad Wekîlî hetê rejîmê Îranî ra ameyî dardekerdene. Embaze Şîrîne gerîla bîye û koyan de bîye. Vera tedaya cinîyan a tewra gerîlayan bîye. Rejîmê Îranî serra 2006î de a esîr girewte. Heta serra 2010î Tehran de zîndan de bîye. Rixmê îşkence û tedayan zî zîndan de aye xo ver da. Embaze Şîrîne koyan de hetê nuştiş, wendiş û têkoşînî ra xo zaf aver berd. Wexto ke embaze Şîrîne ameye dardekerdene vatişê ci yo peyên no bi: 'Beno ke şima eşkenê ganê mi, mi ra bigêrê la şima qet nêeşkenê şerefê mi mi ra bigêrê.'

Embaz Ferzad Kemanger zî zaf welatperwer bi. Bi xo gerîla nêbi, dibistane de mamostatîye kerdêne. Ziwanê kurdî musnayêne domananê kurdan. Ey zî vera sîstemê Îranî têkoşînêko xurt kerd. Rejîmê Îranî pê bahaneya endamîya rêxistine azadîya ey girewte. Sey embaze Şîrîne ey zî vat: 'Se beno wa bibo dewaya ma dewayêka şaşe nîya, ma qet vera sîstemê Îranî çalakîyê eşkerayî nêkerdî, ma rexneyê xo pê metodanê demokratîkan ardî ziwan.' 

Wexto ke embaz Ferzad ame tepiştene bi desan wendekarê ci beşdarê rêxistine bîyî. Embaz Ferzadî mektubêkê xo yê dergî de vatêne: 'Wa zerrîya mi sineyê domanêkî de gandar biba.' Embaz Ferzad û embaze Şîrîne heta hela xo ya peyêne şarê xo fikîrîyayêne. Ê hêvîya ma bîyî. Îşxalker û zorbazî do qet nêeşkê înan bidê vîrakerdene. Ma rêçê xebat û têkoşînê înan de dewam kenê.''