HPGyî nasnameyê 3 şehîdanê Zapî eşkera kerdî

HPGyî nasnameyê 3 şehîdanê Zapî eşkera kerdî û vat: ''Embazanê ma Dîdare, Ozgur û Zemanî hem pê cuya xo ma rê serkêşîye kerd hem zî pê şehadetê xo ma rê fermanê qesasî û têkoşînî da.''

Merkezê Îrtîbatî û Çapemenîye yê HPGyî nasnameyê 3 şehîdanê Zapî eşkera kerdî.

Eşkerayîye wina ya:

''Netîceya têkoşînê fedayî yê gerîlayanê azadîye de rojhelatê Zapî de artêşa îşxalkere teng bîya û waşt ke narey zî rojawanê Zapî de şansê xo bişuxilna û hêrişê îşxalî ver bi na hete hîra kerdî. Destpêkê hêrişanê vera rojawanê Zapî 25ê gulane ra nata embazanê ma bi xoverdayîşêkê fedakarî derbê giranî dayî dişmenî ro. No xoverdayîş serkêşîya tîmanê ma yê hereketînan de hema zî dewam keno. Embazanê ma Dîdare, Ozgur û Zemanîyî guleyo verên eşt dişmenî û qederê nê xoverdayîşî eşkera kerd. Nê embazanê ma bi fedakarî şer kerd û şehîd bîyî. Nê embazanê ma pê şerwanîye û cuya xo mîsyonê xo yê serkêşîye ard ca. Ma soz danê ke têkoşînê înan bi layîqî bîyarê ca û bivisnê serî.

Nasnameyê embazanê ma yê şehîdan wina yê:

Nameyê Qodî: Dîdare Harun

Name û Peyname: Gulîstane Akgol

Cayê Bîyayîşî: Almanya

Maye-Pî: Halîme – Resul

Tarîx û Cayê Şehadetî: 1ê Hezîrana 2022yî / Zap

Nameyê Qodî: Ozgur Memyan

Name û Peyname: Serfîraz Akyuz

Cayê Bîyayîşî: Amed

Maye-Pî: Besra – Mehmet

Tarîx û Cayê Şehadetî: 30ê Gulana 2022yî / Zap

Nameyê Qodî: Zemanî Rojhat

Name û Peyname: Mehmet Yavuzel

Cayê Bîyayîşî: Riha

Maye-Pî: Emîne – Fethî

Tarîx û Cayê Şehadetî: 30ê Gulana 2022yî / Zap

 

Embaze Dîdare mîyanê keyeyêkê mêrdinijî de Almanya de dadîya xo ra bena. Embaze Dîdare verî xebatanê ciwanan de ca gêna û 2017 de tewra gerîlayan bena. Embaze Dîdara ke Almanya û Amerîka de zanîngehan de perwerdeyê felsefe vînena, kurdkî reyde almankî, îngilîzkî, îspanyolkî û tirkî zî hol zanayêne.

Embaze Dîdare Botan de gerîlatîye pratîze kena û rêçê kekê xo yê şehîdî Şehîd Harun Torîyî de şina. Embaze Dîdare bena fermandarêka marîfetîne ya YJA-Starî û mîyanê Hêzanê Taybetan de ca gêna.  Embaze Dîdare xeylêk çalakîyan rê serkêşîye kena. Mîrasê ci yê têkoşînî tim do vernîya ma roşnî bikero.

Embaz Ozgur qezaya Licê ya Amedî de dadîya xo ra beno. Embaz Ozgur 2014 de tewrê gerîlayan beno û verî Botan de gerîlatîye pratîze keno. Embaz Ozgur mîyanê têkoşînî de pê serkêşîya xo vejîyeno vernî û rixmo ke beno birîndar bi lezî weş beno û agêreno têkoşînî. Embaz Ozgur zî mîyanê Hêzanê Taybetan de ca gêno û vera dişmenî tim tewr vernî de şer keno. Embaz Ozgur tim keno ke verê şarê xo, Rayberîye û embazanê xo de mesuldarîyanê xo bîyaro ca.

Embaz Zemanî qezaya Pirsûsî ya Riha de dadîya xo ra beno. Dima ke DAÎŞî hêrişê Kobanê kerd embaz Zemanî 2015 de verî tewrê Şorişê Rojawanî beno. Embaz Zemanî nê prosesê şerî de beno birîndar la têkoşînî ra fek vera nêdano.  Embaz Zemanî dima mîyanê Hêzanê Taybetan de ca gêno. Wextê xoverdayîşê xoîdarekerdişî yê Cizîre de dezayê ey Zemanî (Mehmet Yavuzel) binê bodrumî de wehşetê dewleta tirke de şehîd beno. Embaz Zemanî naye ser o nameyê dezayê xo gêno. Embaz Zemanî xeylêk çalakîyanê serkewteyan de derban dano dişmenî ro û peyê xo de mîrasêkê pîlî verdano.

Embazanê ma Dîdare, Ozgur û Zemanî hem pê cuya xo ma rê serkêşîye kerd hem zî pê şehadetê xo ma rê fermanê qesasî û têkoşînî da. Ma sere de keyeyanê înan ê ercîyayeyan rê pêro şarê welatperwerî yê Kurdîstanî rê serweşîye wazenê.''