'Ma do pê tewirê Helmetî têkoşînî pîl bikerê, ser bikewê'

Komîteya Rayberdişî ya PKKyî: Embaz Helmet xeta PKKyî û karanê şorişî yê PKKyî yê Başûrê Kurdîstanî de goreyê perwerîya seba şehîdan têkoşîno bêmabên û serkewtiş her çî ra ver dî.

Komîteya Rayberdişî ya PKKyî eşkerayîyêke weşaneye û serrgêra 1. ya şehadetê ci de Dîyar Xerîb Muhammed (Helmet) yad kerd. Eşkerayîye wina ya:

''Serra yewine ya şehadetê endamê Komîteya Merkezî ya PKKyî embaz Helmet (Dîyar Xerîb Muhammed) qedîyena. Seke zenîyeno, embaz Helmet 5ê temmuza 2019î de hetê dewleta tirke ra û pê paştdayîşê hemkar û hêzan ê xayînan ra Herêmanê Pawitişî yê Medya de hêrişêkê hewayî de şehîd bi.Sere de embaz Helmet ma şehîdanê ke seba azadîya Kurdîstanî canê xo feda kerdî, yad kenê. 

Embaz Helmet 25 serran şoriş de ca girewt, pêra waranê têkoşînî de gurîya, pêro wezîfeyê xo ardî ca. Mîyanê pêro şert û mercanê zıran de zî bi embazêko mîsal û morê xo da karê xo ro. Hem fermandar û îdarekarêko baş û mesuldar bi hem zî gerîlayêko baş bi. Hetê bînî ra sey roşnvîr, akademîsyenêkî nuşteyî nuştî, dersî dayî. Embaz Helmetî paradîgmaya Rayberîye hol fam kerde û xeta Rayberîya de pê felsefeya Rayberîye têkoşîn kerd. Pê hîşmendîya mabênê ferqê xeta xîyanet û azadî seba ke tarîxê azadîye awan bibo zaf kede daye. Embaz Helmet pê heskerdişê xo yê xoza û huner, pê hîşmendîya xo ya tarîxî bi milîtanêko mîsal. Tewiro Helmetwarî cewabê persê 'Merdimo azad ganî senî biciwîyo' yo. Na raştîye manaya şehîdan a, delîlê bêmergîya şehîdan a.

Başûrê Kurdîstanî rayberîya PKKyî de bi hawayêkê pîlî  hîşyarê azadîye bi. Mabênê şorişê 30 serran de Dr. Şîrwan, Cotyar Hewlêrî, Şêx Kameran Hîranî, Aram Kerkûkî, Geşbîn, Rêda, Genco Xoşnaw, Destîna Qendî, Viyan Caf, Derya Zêbarî, Helwêst Partîzan, Bîlal Şeqlaweyî, Xogir Gezneyî û xeylêk fermandarê rayberî yê sey nînan vejîyayî werte û têkoşîn berz kerd.Embaz Helmet xeta PKKyî û karanê şorişî yê PKKyî yê Başûrê Kurdîstanî de goreyê perwerîya seba şehîdan têkoşîno bêmabên û serkewtiş her çî ra ver dî. Embaz Helmetî bawerîya îradeyê şorişî û hêzê şarê Başûrê Kurdîstanî pê îdîayêka pîle newe kerde û vistî dewre. Seba cuya pîya ya şaran, seba caardişê paradîgmaya neteweyê demokratîkî û cuya azade ya mezhebe gurîya. Embaz Helmetî pêro têgêrayîşanê xco de tim cinîyî sey rayberê şorişî û têkoşînî dî, naye xo rê kerd esas. Vatişê 'Şorişê Başûrî şorişê cinîyan o' yê Rayber Apoyî ra bawer kerd û pê na bawerîye têkoşîn kerd û bi rayberê şarê ma yê Başûrî.

Seke Rayber Apoyî vat partîya ma partîya şehîdan a. Partîya ma rayberîya şehîdan de ewro Rojhelatê Mîyanênî û Kurdîstan de bîye partîya raybere. Nika Kurdîstan de têkoşînêko pîl ê seba azadîye yeno kerdene. Wezîfeyo peyên ê embaz Helmetî vera kolonyalîzmê tirkan afernayîşê yewîya neteweyîye û xurtkerdişê xoverdayîşî bi.

Dişmenê şarê kurdî ewro Bradost, Asos, Şêladizê, Şarbajêr û Heftanîn de hêrişê xo dewam kenê. Labelê hêzê Kurdîstanî zî sere de Heftanîn de pêro Behdînan, Xakurkê, Başûr, Vakur û temamîya Kurdîstanî de xo ver danê. Bêguman no xoverdayîş do ser bikewo.

Ganî rayberîya Helmetî de têkoşînê bêro pîlkerdene, hîşmendîya neteweyê demokratîkî bêra geşkerdene û bingeyê azadîperwerîya yewîya neteweyîye têkoşîn bêro xurtkerdene. No têkoşîn vera hêrişanê qirkerdan û xîretanê îşxalî rayberîya partîya ma de yeno kerdene. Qet yew hêz pê nê xoverdayîşî nêeşkeno. Ba bawerî û têkoşîn Rayberîya Rayber Apoyî de xorin benê, şoriş ser kenê û şarê Kurdîstanî tarîxê meridmîye de ca kenê. Sozê nê têkoşînî embaz Helmetî û şehîdanê ma rê ame dayene. Şehîdê ma tek raştî yê ke xeta Rayber Apoyî de waştişê ma yê têkoşînî û hîşmendîya azadîye pîl kenê.

Nê esasî ser o ma serrgêra 1. ya şehadetê ey de embaz Helmet pê rêz û minetî yad kenê û verê vîrameyîşê ey de sereyê anê war. Seba vîrameyîşê ey ma sozê xo yê seba caardişê yewîya neteweyî ya demokratîke ya şarê Kurdîstanî dibare kenê. Ma reyna keyeyê ey ê erjîyayeyî rê serweşîye wazenê. Kêmkerdişê dejê ey û wayîrvejîyayîşê vîrameyîşê ey wezîfeyê partîya ma PKKyî yo. Nê esasî ser o ma venga pêro ciwananê Kurdîstanî danê ke pê rengê Helmetî serewedaritiş pîl bikerê, vera xîyanet û hemkarîye hamleya azadî û qesasî asta berze de ser bivisnê.''