Mîraso kulturkî yê 12 hezar serran do bibo qurbanê madenan

Seba ke koyê Cilo-Satî yê qezaya Geverî ya Colêmergî bîyî warê madenî do resîmê 12 serran ê kerrayan zî bêrê çînkerdene.

Mudirîya Pêroyî yê Karanê Petrol û Madenî yê Wezîrîya Çimeyanê  Tebîî û Enerjî qezaya Geverî ya Colemêrgî de waranê Golanê Cilo Sat, Koyê Govend, dewa Korgan, ware û dola Nebirnavî yê dewa Koranîsî keno warê madenî.

Koyanê Cilo-Satî yê 4 hezar û 135 metre berzan de resîmê 12 serran ê kerrayan zî do bibê qurbanê madenan. Colemêrg û qezayê ci tarîxî ra xeylêk medenîyetan rê kewanîye kerde. Şikefte bi hezaran de resîmê dewranê verênan estê. Koyê Cilo-Satî pîya bi tarîxê bi hezar serran bi xozaya xo her kesî xo rê heyran verdeno. Bitaybetî zî nizdê sirpilikê koyan de resîmê kerran ê heywan û vilikan estê. Resîmî kerrayan ramojnenê ke wextê seydwanîye û arêdayîşî de zî herême cayê roniştişî ya.

Dewlete bi serran o dest pê talankerdişê herême kerdo. Dormeyê nê koyan de rayîrî ameyî viraştene, golê ci bi herre û kerrayan bîyî de. Nika zî nê cayê tarîxî benê cayê madenî.

Sereko verên ê Komeleya Ekolîyî ya Mezopotamya ya ke bi HKKyan ameye qefilnayene, Fatîh Şahînî vat: ''Senî ke zirar dano hewa, awe, herre, cuya tebbî û merdimanê herême hendê naye zî zirar dano tarîxê herême û no tarîx yeno çînkerdene. Nê resîmê 12 hezar serran qala cuya herême kenê. 68 bajaran de 766 warê madenî bê analîzkerdişê herême ameyî tesdîqkerdene. Ocaxê madenî do eseranê tarîxîyan çîn bikerê. Gever de resîmê kerreyan ê Gevarok, Tirşin, Warfele û Mereş de qeleyê Nûrhaqî, quleyê çimdarî û rayîrê Kerwanî naye rê nimûne yê. No qirkerdişê vera  tarîx û xoza hendê awbendanê asayîşî bêfeyde yo. Hendê Heskîfî trajîk û hendê texrîbato ke DAÎŞî Sûrîye û Iraq de da esaranê tarîxîyan bizirar o.''