PJAKî netîcenameyê Kongreya xo ya 6. eşkera kerd

Partîya Cuya Azade ya Kurdîstanî (PAJK) Kongreya 6. viraşte. Kongre de 3 esasê xebate ameyî eşkerakerdene: Averberdişê sîyasetê demokratîkî, yewîya neteweyîye û caardişê paştdayîşê demokratîkî yê şaran.

PJAKî pare kerd ke înan 10-11ê adare de joyanê Kurdîstanî de Kongreya 6. viraşte. Kongre de bi xurtî ame îfadekerdene ke seba şarê kurdî îmkan û firsendê tarîxî estê û meşrûtîyetê rejîmê Îranî tesîrê xo hêdî hêdî vînî keno.

Kongre de endamê Meclîsê Partîye û hemserekî ameyî weçînayene, hedef û xebatî zî pê 10 madeyan ameyî eşkerakerdene.

Netîcenameyê Kongre wina yo:

''PJAKî 10-11ê adare de koyanê Kurdîstanî de Kongreya xo ya 6. bi şîarê 'Ma neteweyê demokratîkî û yewîya demokratîke ya şaranê Îranî aver berê' viraşte. Kongre de perspektîfê Rayber Apoyî de nîqaşê xurtî ameyî kerdene.Kongre de rexneyanê şarê ma ser o ame vindartene û pê hîşmendîya Modernîteya Demokratîke plansazîya ameyoxî ameye kerdene. Kongreya ma de embazê ma Zîlane Vejîn û Sîyamend Moini sey hemserekan ameyî weçînayene.

Şarê kurdî nika wayîrê îmkan û firsendanê pîlan o. Seba şarê kurdî pê sîstemê xo yê alternatîfî bi rayberê şaran ê bînan ê Rojhelatê Mîyanênî. Coka hêzê emperyalîstî destkewteyanê kurdan kenê hedef û pê talan, komplo û qirkerdişan verê nê prosesî gênê. Seba ke menfaatanê xo bipawê nê hêzî Rojhelatê Mîyanênî kenê warê şerî.

Îran de bi taybetî Rojhelatê Kurdîstanî de rejîmê Îranî hêdî hêdî meşrutîyetê xo vîn keno. Na rewşe boykotê weçînayîşan de hîna zelal ameye dîyene. Ganî pêro şarê Îranî mil bi mil bidê û xoverdayîş xurt bikerê. 

Kongreya ma de de 3 esasê xebate sey hedef ameyî eşkerakerdene: Averberdişê sîyasetê demokratîkî, yewîya neteweyîye û caardişê paştdayîşê şaran ê demokratîkî.

Nê esasan ser o:

1-PJAK vera tecrîdê Rayber Apoyî Kurdîstan û warê mîyanneteweyî de do têkoşîn bikero

2-PJAK seba çareserîya krîzan awankerdişê sîstemê xoserîya demokratîke ya şaran do pêşkêş bikero.

3-PJAK Rojhelatê Kurdîstanî de seba çareserîya demokratîke ya meseleya kurdan û demokratîkbîyayîşê Îranî yewîya demokratîke ya şaran sey esas do bigêro.

4-PJAK do yewîya neteweyîye ya kurdan xebatanê xo de so sey merkez bigêro û vera her hêriş û îşxalê serê Kurdîstanî do têkoşîn bikero.

5-PJAK seba caardişê yewîya neteweyîye pêro cinî, camêrd, kokim, ciwan û her parçeyê komelî daxîlê prosesî do bikero.

6-PJAK do seba yewîya şaran û averberdişê sîyasetê demokratîkî û demokratîkbîyayîşê Îranî xebatanê hemparan bikero.

7-PJAK têkoşînê azadîye yê cinîyan sey paradîgmaya têkoşînê xo do bihesibno û temsîlîyetê têdûştî sey esas do bigêro.

8-PJAK vera hîşmendîya jerontokratî rayberîya ciwanan do bikero.

9-PJAK her hêriş û îşxalê vera şarê kurd û îranî de pawitişê meşrûyî do bikero.

10-PJAK vera texrîbatê xoza do têkoşîn bikero.''