'Rejîm û Tirkîya xîret kenê ke mabênê şaran de fîtne virazê'

Îlhame Ehmed îfade kerd ke qirkerdişê dewleta tirke konseptê hêrişanê qirkerdişî yê û vat: ''Dewleta tirke wazena temamîya Kobanê îşxal bikera la seba ke nêeşkena naye bikera tay cayan de hêrişê merdiman ê rayberan kena.''

Sereka Heyetê Rayberdişî yê Meclîsê Sûrîyeya Demokratîke (MSD) Îlhame Ehmed Qirkerdişê Kobanê yê 23ê Hezîrane, nêzdîbîyayîşê rejîmê Sûrîye yê seba dîyalogan, Qanûnê Sezarî û dîyalogê bi ENKSî ANFyî rê ercnayî.

Qiseykerdişê Îlhame Ehmed ra beşêk wina yo:

''Dewleta tirke waştêne pêro Rojawan îşxal bikera seba ke no planê ci nêbi, beşêkê Rojawanî îşxal kerd. Labelê îşxalkerîya xo ra qet fek vera nêda. Coka tim hêrişê kesayetan ê rayberan û aktîfan kena. Qirkerdişê Kobanê zî netîceya nê xîratan a. Dewleta tirke çîyo ke DAÎŞ nêmcet verda kena temam. Dewleta tirke nêwazena temamîya Kobanê îşxal bikera la seba ke nêeşkena naye b,kera tay cayan de hêrişê merdiman ê rayberan kena. Kobanê binê kontrolê Rûsya de ya, ganî Rûsya her kesî ra zêdêr vera nê qirkerdişî nêrazîbîyayîşê xo bimojnayêne.

Mabênê Tirkîya û Amerîka de 17ê teşrîna verêne de peymanêke ameye îmzakerdene. La Tirkîya na peymane bin pay kena. Dewleta tirke merdiman remnena, qetil kena, îşkence û qirkerdişan kena. Tirkîya nê kerdişan ra mesûldar a.

Rejîm seba dîyalogan û rejîmê xoserî amade nîyo. Rejîm bi hawayêkê pozîtîfî nêzdîyê Îdareyê Xoserî nêbeno. Rejîmî wina propaganda kerd ke çew vano qey Qanûnê Sezarî hetê Îdareyê Xoserî ra kewt dewre. Senî ke eşnawit Qanûnê Sezarî do bêro caardene rejîmî fabrîkayê dermanî qefilnayî. Bazirganîya werdî, şimitişî vindarnayî. Rayîrê bazirganîye asteng kerdî. Bi nê hawayî rejîm Îdareyê Xoserî reş keno. 

Wexto ke mabênê ENKS û PYDyî de dîyalogan dest pêkerd ma xîret kerd ke şar zêdêr tewrê Îdareyê Xoserî bibo. Her di terefî dîyalogan de israr kenê ke no zaf hol o. La tay kesan nê dîyalogan ser o kay kerd. Tay kesan atmosferêko winasên aferna ke Îdareyo Xoser do parçe bibo, têna kurdî îdare de do bimanê, kurdî petrol bigêrê ûsn. No raşt nîyo. Bi nê hawayî mabênê kurdan de fîtne virazîyeno. Îdareyo Xoser ê ereban, kurdan, sûryanîyan, tirkmenan o. Coka ameyîşê petrolî têna êkurdan nê, ê pêro şarê Rojawanî yo. Labelê îstîxbaratê Tirkîya û rejîm pê propagandayanê winasênan zûran kenê û Îdareyê Xoserî reş kenê. Bi nê hawayî wazenê rayîrê yewîya kurdan bigêrê û proses asteng bikerê.

Heta nika qet yew ca de dîyalogê Sûrîye ser nêkewtî. Reya verêne dîyalogêko winasên yeno kerdene. Netîceya nê dîyalogan de no erd do bibo aîdê şaranê Sûrîye.''