Wan de karantîna vurîyaye îşkence

Seba ke tedbîrê qîmî nêgêrîyenê vîrusê Korona Wan de lez vila beno. Merdimê ke karantîna de yê têna vera dîyenê, nînan reyde kesêk/e eleqedar nêbeno/a û bi nê hawayî karantîna vurîyaye îşkence.

Seba ke tedbîrê qîmî nêgêrîyenê û walîtîye mesele pey goş kena, vîrusê Korona Wan de lez vila beno. Rîyê xeyma şînî ya taxa Emîn Paşayî ya qezaya Artemêtanî ya Wanî û dewa Ortanca ya qezaya Tûşba ra hûmara nêweşanê vîrusê Korona bîye 200. Cinîyêke zî vîrusî ra merdî. Şaristan de heta nika 10 kesî vîrusî ra merdî. Wan de 17 hezar kesî binê karantîna de yê. Merdimê ke karantîna de yê têna vera dîyenê, nînan reyde kesêk/e eleqedar nêbeno/a.

Xeylêk kesî ke xeyma şînî ya Emîn Paşayî ra agêrîyî taxanê Gendelova, Kozluca û Yalnizagaçî yê Tûşba pê vîrusê Korona kewtî û herême gêrîyaye binê karantîna. Taxa Taşdonduran a qezaya Payîzava zî seba ke tede kesê estbî ke şîyê şîn, gêrîyaye binê karantîna.

Taxa Gunbaşiyî ya qezaya Payîzava de ke tede verê cû zî karantîna de bîye, seba ke tede reyna nêweşê vîrusê Korona tesbît bîyî, wextê karantîna ame dergkerdene. Taxanê Gedîkbaşi û Ekecekî yê qezaya Elbakî de zî nêweşê vîrusê Korona ameyî tesbîtkerdene. Dima ke di kesê nêweşê vîrusê Korona teberê Wanî ra ameyî, her di taxî zî gêrîyayî binê karantîna. 

Merdimê taxa Emîn Paşayî yê Artemêtanî karantîna de têna vera dîyayî. Taxa ke 22 rojan ra nata karantîna de ya, vejîyayîş û dekewtişê ci qedexe yo. Merdimî keyeyê xo de mehsur mendî. Werd, malzemeyê pakîye, hewcedarîyê bingeyînî înan rê nêdîyenê.

Roniştoxanê taxe vat ke înan xo resna Walîtîya Wanî û selahîyetdaranê dewlete labelê walîyî înan reyde qisey nêkerd. Roniştoxan vat ke karantîna seba înan bîya sey îşkence û dewlete na nêweşîye ser metodêkê cezakerdişî xebitnena.