Êzidîyê Serêkanîyê herra xo canêverdenê

Êzdiyanê Serêkanîyê ke rîyê hêrişanê îşxalî ra mecbûr mendî ke erdê xo ra bar bikerê vat heta ke îşxalkerî erdê ma de bî ma nêeşkenê agêrê la ma herra xo çirey canêverdenê.

Êzidîyanê Serêkanîyê vat hêzanê tirkî hêrişê îşxalî de heme çîyê înan talan kerdo la ê se kenê wa bikerê ma do çirey herra xo canêverdê.

Mehdî Saîd Şêxo ke mecbur mendo dewa Şekerîye ya Serêkanîyê ra bar kerdo şîyo dewêka ezîdîyan a Dirbesîyê vat:  ‘‘Leşkeranê tirkan topî eştêne derûdorê dewe. Ma ser o tim hêrişê giranî estbî ma ewnîyayî ke wina nêbeno mecbur mendî vejîyayî. Ma pîya bi merdimanê xo ameyî dewa Xirbet Eyd. Dima ra rîyê şertanê çetinan ê zimistanî ra ma nêeşkayî ûca vinderê ûca ra zî bar kerd ameyî dewa Xirbe Xwe ya Dirbesîyê. Dewijê ma dewanê Hesekê û Dirbesîyê ra vila bîyî. Heta ke îşxalkerî ûca bî ma anêgêrenê. Gama ke ê vejî ma peyser agêrênê herra xo. Dewa Behîrîye ya ke cîranê ma ya, ûca ra  dewijêko pîr agêra dewa xo îşxalkeran o rehîn girewt û merdimanê ci ra pere waşt. Eke pîr nêbîyêne ma hol zanê ke kiştêne. Ma têna wazenê ke agêrê herra xo.‘‘

Zekîya seîd Xelef zî vat: ‘‘Dewleta tirke û çeteyanê ci hêrişê dewa ma kerd ma mecbûr mendî ke vejîyayî. Xora nê hêrişî giradeyê hêrişanê Şengal û Efrînî yê. Ez dadîyêka êzidîye ya. 4 kêna û 2 lajê mi estî.  Gama ke hêrişan dest pêkerd verî ma arazî de mendî. Bado zî ma ravêrtî dewa Xirbe Xwe û ûca çend rojî mendî. Dima ra ma agêrayî keyeyanê xo no demî de çeteyan çêk-çuwelê ma talan kerd. Nika ma nêeşkenê agêrê dewa xo. Seba ke ma kurdê êzidîyî yê ma qetil kenê. Ma dî înan Şengal û Efrîn de se kerd. Heta ke îşxalkerî ûca bî ma nêeşkenê agêrê la ma çirey herra xo canêverdenê. Eke ê erdê ma ra vejî ma wazenê cade agêrê.‘‘

Dewa Til Seherî ra Mumîn zî vat: ‘‘Gama ke hêrişan dest pêkerd ma  heme çîyê xo caverda û bar kerd.  Îşxalkeran dewa ma talan kerd. Her ca vêşna. Heta ke îşxalkerî ûcayan de bî ma nêeşkenê agêrê. La ma herra xo înan rê nêverdenê.‘‘