Seba ciwîyayîşê ziwanê Kirmanckî ke hetê UNESCO‘yî ra gîrîyabi lîsteya ziwananê ke binê tehlukeyê vîndîbîyayîşî de yê, Almanya de gamêka erjaye ameye eştene. Bajarê  Dûîsbûrgî  de perwerdeyo Kirmanckî ame detpêkerdene.

Hakki Çîmen o ke  42 serrî yo malimîye keno, bi ekîba xo ya 30 kesan hîrê serrî yo bi hawayêkê binîzamî seba perwerdeyê Zazakî xebityeno ke mektebanê Almanya de dersa Zazakî bêro dayene. Xebata hîrê serran ra dima Eyaletê NRW’yî yê Almanya de perwerdeyê Zazakî ame destpêkerdene. Wezîrîya Perwerdeyî yê Hukmatê Eyeletî waştişê pewerdeyê ziwanê dayîkê yê Zazakî qebûl kerd û dersa verêne bajarê Dûîsbûrgî de ameye dayene.Wendakaran bi şayîya pîle dest bi dersa verêne kerde.

Malimê dersa Zazakî Hakki Çîmenî  keyfeşîya xo ard ziwan û va: ‘‘Almanya de 300 hezar kesê ke Zazakî qisey kenî estî. Ma serra 2015’î de na babete ser o fikiryayî. Bado zî ma  Dûîsbûrg û dormeyê ci de Komela Velîyan a Zazayan na ro.  Êyê ke zerrî daya nê karî, nînan ra ma ekîbêk vîjîna û dest bi xebatanê xo kerd. Dima ra Beşê Edebîyat û Ziwanê Zazakî yê Ûnîversîteya Dêrsimî ra ma paştgerîya zanistî girwte. Tîya zî parlamenterê  SPD’yî Serdar Yuksel ma rê rehberîye kerd û Tarîxî de çîyêko verên bi. Sîtemê Perwerdeyî yê Almanî de Zazakî sey perwerdeyê ziwanê dayîke  ca girwt. Dîûsbûrg de 4 mekteban de  70 ra zafêr gicê ma hewte de 3 saet dersa Zazakî gênî. Ez sey mamosteyî qican û keyeyanê înan de şayîya pîle û eleqeyo gird  vînena. Ma do pede pede  perwerdeyê Zazakî heme Almanya ra vila bikê.‘‘

Mektebê ke  dersa Zazakî  yena dayene, roje û saetê înan wina yê:

Roja Sêşemeyî:

Seba sinifanê 1., 2., 3. 4.  adresê GGS Sternstraße 76, 47179 Dûîsbûrgî de mabênê saetanê: 11.30  û 13.45 de, seba sinifanê  5.,6.,7.,8.,9. û 10. adresê  Bekerlohstraße 81, 47179 Dûîsbûrgî Kopernikus Gymnasium de mabênê saetanê 14.15 û16.30 de dersê Zazakî yenê dayene.

Roja Çarşemeyî:

Seba sinifanê 1., 2., 3. 4. adresê GGS Klosterstr., 47051 Duisburg mabênê saetanê 13.15 û 15.30 de, seba sinifanê 5.,6.,7.,8.,9. ve 10. Adresê Mainstr., 47179 Dûîsbûrgî Landfermann Gymnasium de mabênê saetanê 16.15 û 18.00 dersê Zazakî yenê dayene.

Çime: Tjb-Presse