Merkezê Îrtîbat û Çapemenîya Hêzê Pawitişê Şarî (HPG-BÎM) bi îzehetêko nuştekî derheqê çalakîyê ke hetê gerîlayan ra ameyî kerdene de melumatî dayî. HPG-BÎMî vato artêşa tirkî bitaybetî warê Gerdîya yê Şemzînanî de derbê girdî werdî. HPGyî vato ‘gerîlayan çar baskan ra dayî artêşa tirkî ro û netîceyê ci de tewr tay 20 leşkerî kişîyayî’.

Goreyê îzehetê HPGyî Gever de gerîlayanê YJA Starî çend çalakîyî viraştî û netîceyê çalakîyan de 2 leşkerî kişîyayî û nuqteyêka bîne de zî 2 meterîsê leşkeran ameyî îmha kerdene û netîceyê çalakîye de 6 leşkerî kişîyayî.

ŞEMDÎNLÎ DE 20 LEŞKERÎ KIŞÎYAYÎ

HPGyî îzehetê xo de dîyar kerdo ke ê çalakîyan çarçewaya Hemleya Şorişgêrî ya Şehîd Pîroze û Şehîd Agirî de viraştî. Temamê îzehetî wina yo:

“19ê êlule saete 18.15 de hêzanê ma warê Gerdîya de vera qereqolê Stunê de çar baskan ra çalakîyêk viraşta. Netîceyê çalakîye de 2 konteynirî û 2 meterîsî bi temamî ameyî îmha kerdene. Qaso ke ameyo tespît kerdene, netîce de 20 leşkerî ameyî kiştene û xeylê leşkerî zî birîndar bîyî. Artêşa tirkî çalakîye ra dima dormeyî bi obus û hewanan bombe kerda. Reyna artêşa tirkî bi helîkopterê kobra û skorskyî ameya herême û merde û birîndarê xo kiriştî.

Reyna eynî roje saete 8.30 de hêzanê YJA Starî vera Girê Elîşêrî yê Geverî de çalakîyêka suîqestî viraşta û netîceyê çalakîye de 2 leşkerî merdî.

GIRÊ ELÎŞÊRÎ DE 6 LEŞKERÎ KIŞÎYAYÎ

20ê êlule saete 7.40 de hêzanê ma vera leşkerê ke Girê Elîşêrî de ca bîbî de çalakîyêk viraşta. Netîceyê çalakîye de 2 meterîsî ameyî îmha kerdene û 6 leşkerî kişîyayî.

OPERASYON Û HÊRIŞÊ ARTÊŞA TIRKÎ

17ê êlule saete 14.30 de artêşa tirkî qezaya Ovacixî ya Dêrsimî de operasyon dayo dest pêkerdene. Eynî roje teyarayê artêşa tirkî mabênê saetanê 20.30 û 24.00 de warê operasyonî bombe kerdî. 18ê êlule helîkopteranê kobrayan saetanê serê sibayî de herême bombe kerdî. Operasyonan ra dima artêşa tirkî leşkerî herême de ronayî. Operasyon eynî roje bênetîce tepîya ancîyayo. Xeberê ke derheqê operasyonî de medyaya tirkî de dîyenî zurî yî. Nê operasyonan de ti zaîyatê ma nêbîyo.

WARÊ GERÎLAYAN AMEYÎ BOMBE KERDENE

Teyarayê artêşa tirkî 19ê êlule de hêrişê dewa Fileyan, 20ê êlule de hêrişê warê Saca û dewa Fileyan, 21ê êlule de hêrişê warê Kunîşka û Çemço kerdî. Netîceyê bombardumanî de daristanê dewa Fileyan de şewat vejîyayo û rez û bexçeyê dewijan zirar dîyî.”