Dîrektora fîlmê Les Filles du Soleil (Keynayê Tîje) ke babeta ci mucadeleyê cinîyan ê kurdan o, Eva  Hussone ANFyî rê qisey kerd.

MI WAŞT KE XOVERDAYÎŞÊ CINÎYAN Ê KURDAN RAMOJNÎ HEME DINYA

Hussone bale ante xoverdayîşê cinîyan ê kurdan ser û va: ‘‘Mi qirkerdişê  Şengalî ser xeylî wend. Cinîyê ke destê DAÎŞî ra xelisyayêne senî tifingî girewtêne xo dest mi nê wendî, zaf tesîrê nînan de menda û mi qerarê viraştişê fîlmî girewt. Mi waştêne ke tena dej nê, xoverdayîşê cinîyan ê kurdan zî ramojnî. Her cayê dinya de cinîyê ke trajedîyê înan estî la rîyê tersî ra bêveng manenî estî. Mi waşt ke xoverdayîşê cinîyan ê kurdan bi filmêk sey nimûne ramojnî nê cinîyan. Cinîyê ke bîyê babeta fîlmê mi bêters ê, milê xo çewt nêkenî û zîhnîyetê serdestî red kenî.‘‘

MI MESELEYA KURDÎ NÊ CINÎYÎ GIREWTÎ DEST

Hussone qiseykerdişê xo rê wina dewam kerd: ‘‘Meseleya kurdî meseleyêka gird a. Xora ez na meselaye rê serdest zî nîya. Coka mi meselaya kurdî nê, xoverdayîşê cinîyan sey babete girewt. Amacê mi qalê cinîyan kerdiş bi û mi no zî kerd.‘‘

‘JIN, JIYAN, AZADΑ HÊZÊ CINÎYAN O

Hussone slogana ‘Jin, Jiyan, Azadî’ ser zî wina va: ‘‘Na slogana  cinîyan ê PKKyî ya ke Ocalan ci rê rayberîye keno,  înan ra yena û  mehneya cinîye, estbîyayîş û hêzê cinîyan sîmge kena. Na slogana ke hendî bîya unîversale merkezê filmî de ca gêna. Na slogane mehne û hêzê xo yê girdî ya pîya roştî dana tarîxê cinîyan.‘‘

OCALAN HÊZ DANO CINÎYAN

Hussone da zanayene ke nuşteyê Ocalanî yê derheqê cinîyan bala aye ancenê û va: ‘‘Ocalan tena perwerde camêrdan rê nêdano û paradîgmaya komelêko seypê û azad nêgeno dest, heman wextî de Ocalan hêz û bawerî dano cinîyan ke ê her çî bi hêzê xo bikerê.

EYBÊ  KOMELÊ MÎYANNETEWEYÎYE

Hussone vist vîrî ke kurdan peynîya DAÎŞî arda û wina dewam kerd: ‘‘Rojawanî, dimayo ke DAÎŞ ver bi qedîyayîşî şi Kurdî tenya verdayî. No seba komelê mîyanneteweyî eybêko gird o. No kurdan rê îxanet o.‘‘