Dostîya Kitaban a Dêrik û Kreuzbergî

Mabenê qezaya Kreuzbergî ya Berlînî û bajarê Dêrikî yê Rojawanî de têkilîyêka başe ameya viraştene û na têkilîye bi dostîya kitaban dewam kena.

Şaredarîya Bajarê Kreuzbergî, serra 2017î de Şaredarîya Dêrikî sey şaredarîya way û birayî îlan kerdebî. Kontratê  way-biratîye de, hem hetê kulturî, hem hetê paştdarîye ra, bale ancîyabi taybetîya bajaran ser.  

Pey cû seba ke her di bajarî pîya projeyan bivirazê, yew komele ya bi nameye “Komela Way-Biratî ya Bajaranê Kreuzberg û Dêrikî” ameyebî ronayene. Îdarekarê komele menga Teşrîna verêne de Dêrik ziyaret kerdbî. Kitabxaneyê bajarîyo tek o ke nameye xo Manesa yo bala zîyaretkaran antbi.

Kitabxaneyê Manesa bi pêşnîyaz û têkilîya komele payan ser vindeno. Yew kitabxane yê bajarê Kreuzbergî yo ke nameye xo Oh21 o, Manesa de têkilîya kitaban naye ro û mabenê her di bajaran de dostanîya kitaban ameye awankerdene.

Kitabxaneyê Oh21î de, derheqê kultur û rewşa sîyasî ya Rojawanî de kitabî ca gênê. Manesa zî  wazeno ke  kitabe îngilizkîyî hîna bibê zêde û naye ser xebatî yenî kerdene.

Hetê bînî ra her di kitabxaneyî kitabanê xo do bi hewayê pêvûrînî pêşkêşê wendekaranê xo bikerê. Îdarekaranê Oh21 no derheq de wina va: ”Bi ney xebatî ma wazenîme ke paştdarîye bidîme îdareyê Rojawanî bitaybetî zî îdarekarîya cinîyan. Reyna ma zîyaretkar û mişterîyanê kitabxaneyê xo rê derheqê kultûr û mucadeleyê Rojawanî de qisey kenîme û munaqaşayan kenîme.”

Dostîya ke mabênê Kreuzberg û Dêrikî de ameya ronayene sey nimûne bîya vila û mabênê bajaranê Oldenburg û Efrînî de zî prokeyêka winasîye ameya destpêkerdene. Reyna mabênê bajaranê Frankfurt û Kobanê de zî têkilîyêka winasîye ya domanan esta.