Erdal: Ganî her kes semedê xoverdayîş û şerî hazir bo

Erdal: Eke ma wazenê bi anorê xo bihuzur biciwîyê ganî ma xoverdayîş û şerî rê hazir bê. Herême de şerêk esto. Heme kurdî ya azad benê ya zî reyna Lozano newe beno belayê sereyê kurdan.

Fermandaranê Qerargehê Merkezê Pawitişê Şarî ra Bahoz Erdalî programê taybetî yê Stêrk TVyî de cewabê persanê Rosîda Mêrdin dayî.

Dewleta Tirke Bizanayîş Til Rifat de Domanî Qetil Kerdî

Qiseykerdişê Doktor Bahoz Erdalî ra tayî cayî wina yê: ''Dewleta tirke Til Rifat de vera şarê ma û domananê efrînijan qirkerdişêk kerd. 8ê înan domanî 10 sivîlî ameyî qetilkerdene. No qirkerdişêko plankerde bi. No hêriş bizanayîş ame kerdene ke domanê efrînijî bêrê kiştene. No qikerdiş zî sey Qirkerdişê Roboskî û Qirkerdişê Kendakola yo. Heme hetê dewleta tirke ra ameyî kerdene. Nê hêrişan reyna ramot ke xopawitiş senî muhîm o. Ma do bi girdkerdişê têkoşînî hesabê nê qirkerdişan înan ra bipersê. Hetê bînî ra no qirkerdiş ramojneno ke dewleta tirke senî vera têkoşînê şarê ma bêçare ya. Ê se kenê wa bikerê Rojawan de do têkoşînê şarê ma ser bikewo.

Adresê Çareserî Şam o

Dewleta tirke xo sey serkewte ramojnena la çîyêko winayên çîn o. Dekewtişê Serêkanîyê û Girê Sipî serkewtiş nîyo. No îşxal o. Her çiqas nameyê dişmenê ma dewleta tirke bo zî esle xo de DAÎŞ o. Zîhnîyetê înan yew o. Ê do bedelê nê hêrişan giran bidê. Herême de demo kilm de çareserî û haştîye mumkun nîyê. Eke ma wazenê bi anorê xo bihuzur biciwîyê ganî ma xoverdayîş û şerî rê hazir bê. Herême de şerêk esto. Heme kurdî ya azad benê ya zî reyna Lozano newe  beno belayê sereyê kurdan. Çi heyfo ke demê nê xoverdayîş û şerî de rijnayîş esto, merg esto. Bitaybetî ez wazena vajî ke Sûrîye û Rojawan de cayê çareserkerdişê meseleya kurdî Şam o. Adresê çareserî Şam o. Hukmatê Sûrîye ganî hînî nê fobîyê kurdan  ra xo bixelisno. Erdogan wazeno Sûrîye îşxal bikero. Nêzdîbîyayîşê hukmatê Sûrîye yê vera kurdan Erdogan rê xizmet keno. Rejîm nika xeyrê xoverdayîşê Rojawanî esto. Ganî Rejîmê Sûrîye naye xo vîra nêkero û kurdan û YPGyî rê spas bikero.

Hêrişanê îşxalî Kurdî Hetê Ruhî ra Ardî Têhet

Hêrişanê îşxalî yê dewleta tirke yê vera Rojawanî kurdî hetê ruhî ra ardî têhet.  Erdogan her çiqas biwazo kurdan yewbînan ra bikero cîya û pêverdo zî nê hêrişê ey kurdî ardî têhet. Na yew raştîye ya. Kurdî hetê ruhî ra yew bîyî û vera hêrişan wiriştî lingan ser.  Çar parçeyê Kurdîstan û teberê welatî de kurdî payan ser ê. Yewîya neteweyîye ya kurdan hewcedarîyêka cuyekî ya. Seba ke kurdî heta ewro yew nêbîyî û pîya tê nêgêrayî vînî kerd. Wextê Lozanî de kurdî zehîf bê û têgêrayîşê kurdan  pîya tê nêgêrayêne. Coka ganî nika kurdî hêzê xo yew bikerê. Ameyoxê kurdan yew o. Ya ma benê azad ya zî vînî kenê. Eke ma lozananê newayan nêwazenê ganî ma yew bê.

Gerîla bi Taktîkanê Neweyan Derbeyanê Girdan Dano Dişmenî ro

Şorişê Rojawanî kurdi kiriştê rojdemê dinya. Xora tesîrê PKKyî heme Kurdîstan û Rojhelatê Mîyanênî  ser o esto. Erdogan vano problemê ma  bi şarê kurdî çîno, bi PKKyî esto. O çax wa Vakur de heqanê kurdan nas bikero. Reyna Rojawan de zî wa kurdan nas bikero. La ma zanî ke raştî de prblemê înan bi kurdan esto. Erdogan Başûr de zî vera statuyê Kurdîstanî yo. Vano, ‘‘ Ma vakurê Iraqi de xeta kerd, ma do vakurê Sûrîye de eynî xetayî mekerê‘‘ nê 6 serranê peyênan de çend ray wina va. Kerdişê Erdoganî yê vera kurdan kerdişanê Çîllere ra ravêrtî. Ganî aqibetê ey zî Çîlere ra xirabêr bo.  Rixmê heme hêrişan ê çirey nêeşkenê kurdan teslîm bîgêrê. Xora gerîla bi taktîkanê neweyan mîyanî tê gêreno, derbeyanê giranan dano dişmenî ro û plananê înan pûç vejeno. Coka ê zaf bihêrs ê. Wa şarê ma zî şorişî rê xiyanet mekero û ajanîye û qoricîye qebûl nêkero. Kurdî ganî her hetî ra yew bê. Têna wina ma eşkenê ser bikewê.''