Festîvala Fîlman a Kurdan a Stenbolî ke emser reya ewilêne virazêno mabênê 6-10’ê Adare de hetê Kolektîfê Sînemaya Mezopotamya ra yena organîzekerdene. Fîlmê festîvale do salona Elmadagî ya Stenbolî ya Kolektîfî de bêrê ramotene. Festîvale de pêro pîya do 34 fîlmê dergî, kilmî û belgefîlmî bêrê ramotene.

Derheqê festîvale de Veysî Altayo dîrektor ke mîyanê organîzasyonê Kolektîfî de yo, vat, heta nika fîlmê ke Ewropa de yan zî perçeyanê bînan ê Kurdistanî de ameyî antene Stenbol de nêameyêne verê temaşekaran û ard ziwan ke “Ma wazenê nê fîlman biyarê verê temaşekaranê Stenbolijan.”  

HEM DO BÊRÊ TEMAŞEKERDENE Û HEM ZÎ NÎQAŞKERDENE

Altayî ard ziwan ke festîvale do hîra bo, çar perçeyanê Kurdistanî yan zî Ewropa û cayanê bînan de derheqê Kurdan de hetê dîrektoranê Kurdan ra ameyê antene, yan zî fîlmê ke kaybazê înan Kurd ê, do festîvale de bêrê ramotene û vat, pîya bi fîlmanê dergan, kilman û belgefîlman do 34 berhemî festîvale de estbê. Altayî vat, “Hetêna ra do derheqê sînemaya Kurdan de panelî bêrê viraştene. Na festîvale de hem do sînema Kurdan bêro temaşekerdene û hem zî munaqeşekerdene. Muhîm o ke merdim tecrubeyê sînemaya Kurdan de biewnîro halê mewcûdî ra, ameyoxê ci ra, têkilîya aye bi kolonyalîstê aye ra û ziwan û terzê ci bêrê munaqeşekerdene. Amacê ma yo sereke o yo ke ma keda xo seba averşîyayîşê sînemaya Kurdan bikerê vêşî. ”

 ‘ÎHTÎYACÎYA MA BI KRÎTÎKANÊ TEMAŞEKARANÊ MA ESTA’

Altayî dewam de vat no destpêkêk o û wina dewam kerd, “Beno ke tayê kemasîyê ma estbê, belkî programê ma seba xeylî merdiman kemî biaso la ma vanê na gama vernîye muhîm a” û wina veng da, “Ma veng danê temaşekaranê xo ke festîvale rê wayîr vejîyê. Îhtîyacîya ma bi temaşekaranê ma esta ke bi krîtîkanê xo hem fîlman, hem dîrektoran û hem zî ma sererast bikerê.”

Altayî heman wextî de vat 24 yan zî 25 dîrektorî do tewrê festîvale bibê û tayê fîlmê ke do tewrê festîvale bibê nê yê:  

*Fîlmo derg ê Ender Ozkahramanî ê bi nameyê ''Biryareke zor'', dîrektor zî do hazir bo.

*Dîrektorê fîlmê “Mîyan De” (Arada) Alî Kemal Çinar, do Amed ra bêro.

*Ozcan Alper o ke derheqê Sûrî de anîmasyonê bi nameyê ''Kavil'' viraştibi.

*Rojakewtene ra dîrektorê fîlmî yê “Jîna bê jiyan,” Kaveh Moeînfar.

*Fîlmê Zagrosî yê Sahîm Omar Kalîfayî, ke xeylî xelatê mîyannetewîyî girewtê.

*Fîlmê 'Bîr' ke hîkayeya Mayê Şemeyî û yê kesanê meçhûlkerdeyan qal keno.

*Efsaneyê Kralê Nexweşik'î yê Huseyîn Tabakî.

*Fîlmê ''14'ê Tîrmehê' yê Haşim Aydemîrî.

* Ê Husseîn Hasanî “Reşeba.”

* Ê Alî Gulerî “Şeva Xîzê.”

*Ê Ardîn Dîrenî, “Her malek dibistanek.”

*Heman wextî de fîlmê ke Komûna Fîlman a Rojavayî antê zî do festîvale de hadre bê.